Samcor

Die South African Motor Corporation, algemeen bekend as Samcor, was 'n Suid-Afrikaanse motorvervaardiger wat in 1985 geskep is deur die samesmelting van die Suid-Afrikaanse filiaal van Ford en Sigma (voorheen bekend as Amcar – American Motor Corporation), wat Mazdas vervaardig het vir die plaaslike mark. In 1988 het Ford weens politiek onttrek uit Suid-Afrika en sy belang in Samcor verkoop.

South African Motor Corporation
Tipe	Filiaalmaatskappy
Gestig	1985
Hoofkantoor	Pretoria, Suid-Afrika
Gebied bedien	Suid-Afrika
Industrie	Motorvervaardiger kommersiële voertuigvervaardiger
Moedermaatskappy	Ford
Ontbind	2002

As 'n gevolg van die samesmelting, het Ford en Mazda hulle modelle begin deel in Suid-Afrika, soos hulle toe reeds in ander markte gedoen het. Die Europees-gebaseerde Ford Escort en Sierra is vervang deur die Laser/Meteor en Telstar, gebaseer op onderskeidelik die Mazda 323 en 626. Die omruil van Mazda- en Fordmodelle se kentekens was minder gewild gewees by Suid-Afrikaanse kopers as in ander lande, soos Australië en Japan.

Bykomend tot Ford en Mazda produkte, het Samcor ook Mitsubishi handelsvoertuie gebou, soos die Mitsubishi L300 minibus wat as die Ford Husky ontplooi is.

In 1994 het Ford 'n 45 persent aandeel in Samcor gekoop, en in 1998 die oorblywende deel. Hierna is Samcor hernoem na die Ford Motormaatskappy van Suidelike Afrika.

Agtergrond

Ford Suid-Afrika was gebaseer in Port Elizabeth (nou deel van die Oos-Kaapprovinsie) en bestaan reeds sedert 1923. In die vroeë 1980's het Ford beide 'n groot voertuigmonteeraanleg en 'n enjinaanleg in Struandale bedryf, saam met 'n ouer monteeraanleg in Neave. Ná die samesmelting met Sigma en die vorming van Samcor, het die enjinaanleg voortbestaan onder Samcor en is in 2020 steeds onder Ford-eienaarskap. Beide die monteeraanlegte is gesluit en alle voertuigproduksie is na Samcor se Silverton-aanleg in Pretoria verskuif. Die Struandale-monteeraanleg is daarna verkoop aan die "Delta Motorkorporasie" (tans General Motors Suid-Afrika).

Suid-Afrikaanse Ford/Mazdamodelle

• 
  Ford Sierra 3-deur
  1985–1993
• 
  Ford Sapphire
  1988–1993
• 
  Ford Husky (gebaseer op die Mitsubishi L300)
  1985–1991
• 
  Ford Escort
  1986–1988
• 
  Mazda 323 Midge
  1988–1996
• 
  Ford Meteor
  1988–1998
• 
  Ford Laser
  1988–1998
• 
  Ford Bantam Leisure / Mazda Rustler
  1987–2002
• 
  Mazda 323
  1986–1995
• 
  Ford Telstar
  1993–1998
• 
  Mazda 626 luikrug
  1993–1998

Silverton-monteeraanleg

Die Silverton-monteeraanleg (25°43'21" S 28°20'06" O) is geleë in Simon Vermootenweg, in 'n industriële gebied aan die buitewyke van Silverton. Dit is ongeveer 15 km (9 myl) oos van Kerkplein, die sentrum van Pretoria. Die swart woonbuurt Mamelodi is naby geleë, en baie van Samcor se arbeidsmag kom van daar af. Op die hoofperseel is die monteeraanleg self en twee administrasiegeboue. Aangrensend is die Onderdele & bybehorepakhuis wat ook die kliëntedienskantore insluit.

Samcor het ook sy eie ontwerpateljee en diensopleidingsfasiliteit bedryf, beide in die nabygeleë Silvertondale. Albei is in die 1990's gesluit. Oorspronklik is die fabriek in 1961 vir Chrysler gebou, en vroeë modelle wat by Silverton gebou is het ingesluit die Chrysler Valiant en die Peugeot 404 en 504. Teen 2015 is die monteeraanleg steeds onder Ford-eienaarskap. Dit vervaardig nou net die Ford Ranger-bakkiereeks en, in kleiner hoeveelhede, die soortgelyke Mazda BT-50 bakkie.