Stephanus Buys
Stephanus Johannes Buys (Burgersdorp, 28 November 1882 – onbekend) was 'n koerantredakteur en gemeenskapsleier.
Buys se ouers was Barend Rudolph en Levina Susanna Lasya Kruger. Die stamvader, Barend Buys, het op 9 Januarie 1715 met die skip Risdam in die Kaap die Goeie Hoop aangekom in diens van die Verenigde Oos-Indiese Kompanjie. Toe die skip op 27 Januarie na Batavia vertrek, het hy en nog 10 soldate aan die Kaap agtergebly. Hy is op 12 Oktober 1721 in die Kaap met die 15-jarige Alida van den Bereg getroud, die dogter van Jacobus en Jacomina Carteniers. Van hul 10 kinders was sewe dogters en drie seuns.
Stephanus Buys se vader het as Kaapse Rebel aan Boerekant aan die Tweede Vryheidsoorlog deelgeneem en onder meer te Stormberg geveg. Hy was ’n dienaar in die Gereformeerde kerk Aliwal-Noord. Stephanus Buys het as seun ook by die Boerekommando's as Kaapse Rebel aangesluit. Later was hy krygsgevangene, maar dis nie bekend of hy verban is nie. Hy was eers onderwyser en later drukker. In 1912 het hy na Aliwal-Noord verhuis, waar sy broer Andries sy skoolloopbaan voltooi het, en daar met die Aliwal Nuus begin. In 1919 het hy die Karonuus aangekoop.
Buys het in 1915 by die Nasionale Party aangesluit en sy koerent het kragdadig in die algemene verkiesing van 1915 meegehelp. Hy was lid van die Helpmekaar (Helpmekaar Studiefonds) en sekretaris van die afdelingsbestuur. Later was hy lid van Willowmore se stadsraad en van die skoolraad. Hy het verskeie verhale geskryf en sy oorlogsondervindings meegedeel in die boekie Bergskotspeel.
Buys is in 1911 getroud met Lourika Kruger. Uit dié huwelik is drie kinders gebore.
Bronne
wysig- (af) (en) Reitz, Hjalmar en Oost, Harm (reds.), Goodman, I.M. (samesteller). 1931. Die Nasionale Boek. 'n Geskiedenis van die ontstaan en groei van die Nasionale Party van Suid-Afrika en wat dit bereik het, tesaam met belangwekkende Artiekels in verband daarmee. Johannesburg: Nasionale Boek Maatskappy, 1931.