Anna Vorster

Anna Dorothea Vorster (11 Junie 1912 – 24 Augustus 2005) was tussen 1935 en 1973 predikantsvrou in sewe gemeentes of kombinasies van die Gereformeerde Kerk, waarvan vyf in die destydse Transvaal en een elke in die Vrystaat en Noordoos-Kaapland.

Mev. (ds.) Anna Vorster en haar man, ds. J.L. Vorster.

Drienie Coetzee (links), eggenote van prof. A.G. Coetzee, en Anna Vorster op 27 Maart 1987.

Vorster was ’n dogter van D.G.W. de Vos van die plaas Ebenhaezer, distrik Koffiefontein en sy eggenote, wie se naam die bron nie vermeld nie. Nadat sy gematrikuleer het, het sy na die Potchefstroomse Universiteitskollege gegaan vir verdere studie. In 1934 is sy getroud met prop. J.L. Vorster (1908–1990). Uit hul huwelik is twee dogters gebore.

As jong predikantsvrou het sy dadelik ’n geweldig groot taak gehad, want haar man was predikant van die kombinasie Piet Retief, wat ook Stegi, Goedgegun en Paulpietersburg ingesluit het. Ná ’n driejarige bediening van 1935 tot 1938, het die egpaar na Durban verhuis om predikantspaar van die plaaslike Gereformeerde kerk te word. In hul tyd, op 6 Desember 1939, is die benaming Dorkasvereniging in die Gereformeerde kerk Durban vervang deur die Gereformeerde Sustersvereniging – algemeen bekend as die GSV. Hoewel nuwe statute aanvaar is, het die nuwe vereniging (onder leiding van mev. ds. Vorster) dieselfde werk as sy voorganger bly verrig: In samewerking met die kerkraad en die JV is verkopings gereël en gehou; behoeftiges is versorg; Kerspakkies is geskenk aan oues van dae en siekes; finansiële steun is verleen aan verdienstelike sake soos die Kruger-weeshuis, die Sending, dowes, blindes en melaatses. Wyksusters het apart vergadering begin hou en op die maandelikse vergadering dan net verslag van hul werksaamhede kom doen. Dit het die susters in staat gestel om meer tyd in te ruim vir lesings en sangoefening tydens die vergaderings.

Ná nog ’n driejarige bediening het die egpaar Vorster na die Noord-Vrystaat vertrek waar hulle van 1942 tot 1944 gearbei het in die kombinasie Ventersburg, Kroonstad, Odendaalsrus, Theunissen (insluitende Winburg). Hul tweede stadsgemeente was aan die Rand, waar hulle van 1944 tot 1948 verbonde was aan die Gereformeerde kerk Johannesburg-Oos.

Van Steynsburg was hulle die pastoriepraar van 1948 tot 1953, Bloemfontein-Wes van 1953 tot 1958 eindelik van Potchefstroom-Noord van 1958 tot 1973, die gemeente waar hulle die langste gebly het.

Gedurende al die jare het Anna Vorster opgetree as voorsitter van die sustersaksie in die verskillende gemeentes. Terwyl hulle in Kaapland was (Steynsburg), was sy vyf jaar lank voorsitter van Kaapland. Van 1953 tot 1958 het sy opgetree as voorsitter van die Sustersorganisasies van die Oranje-Vrystaat. Sy was dus 10 jaar lank lid van die Uniale Komitee waarin sy dikwels as hulpsekretaresse moes waarneem.

Bronne

• (af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.