Dranus Vermeulen

Afrikaanse dramaturg en senior lektor in Afrikaans en Nederlandse letterkunde aan die Universiteit van Natal.

Dranus Vermeulen (1942- ) is ’n Afrikaanse dramaturg en senior lektor in Afrikaans en Nederlandse letterkunde aan die Universiteit van Natal.

Lewe en werk wysig

Hendranus Johannes (Dranus) Vermeulen is op 13 Augustus 1942 op Elliot gebore. Hy word groot op Swellendam. Toe hy ses jaar oud was, verhuis die gesin na Middelburg in die Karoo nadat sy vader aangestel is as hoof van die plaaslike hoërskool. Hier begin hy sy skoolopleiding aan die dorp se laerskool. In 1956 verhuis hulle na Carnarvon, waar hy in 1960 matrikuleer. Hierna studeer hy vanaf 1961 verder aan die Universiteit van die Oranje-Vrystaat, waar hy in 1963 die B.Admin.-graad met onderskeiding behaal. Hy was werksaam in die koerantwese en by 'n bank voordat hy by die Staatsdiens aansluit. In 1972 behaal hy die B.A. Honneurs-graad in Afrikaans en Nederlands aan die Universiteit van Natal met onderskeiding en in 1974 die M.A.-graad cum laude met 'n verhandeling oor Die Idioom van die Absurde Teater en Chris Barnard se Pa maak vir my ’n vlieër Pa.[1] Sedert 1972 was hy as senior lektor verbonde aan die Departement Afrikaans en Nederlands aan die Universiteit van Natal in Pietermaritzburg. Hy het drama en poësie doseer en meermale as regisseur by die opvoering van dramas deur die studente opgetree, onder meer in 1991 “Die trommel” van André P. Brink, waarin die skrywer Izak de Vries die hoofrol speel. Hy is getroud met Cornelia Petronella Elizabeth Vermeulen.

Skryfwerk wysig

Sy drama “Bus-stop[1] is geheel en al in die gees van die Teater van die Absurde geskryf. Dit beeld drie vaal mannetjies uit wat almal op een bus wag om hulle na verskillende bestemmings te neem. Op tipiese absurde wyse word die kringloopgebeure, soeke na die self, verwarring tussen werklikheid en verlede, vrugtelose dialoog, die soektog na identiteit en teenstrydige vertolking van werklikheid en herinnering gebruik. Uiteindelik bly die karakters heeltemal haweloos sit, vergete van mens en God, nadat hulle die vermeende inspekteur wat moontlik die almagtige skepper van hulle lot kon wees, vermoor het. Hoewel ’n sterk bydrae tot hierdie teatervorm, bring dit nie iets nuuts nie.[2]

Sy kortverhaal “Die storie se storie” word in Standpunte gepubliseer en sy kortverhaal, “’n Slang in die tuin van ons reënboognasie”, word opgeneem in die versamelbundel “In ’n neutedop”, onder redaksie van Izak de Vries en Karen Simpson. Hy is ook digter en sy lang gedig, “Skynwaters”, word in Augustus 1984 in Standpunte gepubliseer.

Van hom verskyn ’n aantal artikels oor die letterkunde in tydskrifte soos Standpunte en Journal of Literary Studies. Hy skryf ook die blokboeke oor “Die rebellie van Lafras Verwey” deur Chris Barnard en “Kanna hy kô hystoe” van Adam Small. Saam met C.J.M. Nienaber en M. Nienaber-Luitingh is hy die samesteller van “Poort 1978: ’n keur uit die werk van hoërskoolleerlinge”, terwyl hy in 1973 die huldigingsbundel saamstel aan G.S. Nienaber ten tyde van sy sewentigste verjaarsdag, “Sewentiger G.S. Nienaber”. In 1986 is hy die samesteller van die bundel “Drie hoorspele deur N.P. van Wyk Louw”. Vir skoolgebruik skryf hy, in medewerking met ander, handboeke vir Afrikaans om voorgeskryf te word aan tweede taal leerders, onder andere “Skakering” (’n handleiding by die studie van gedigte wat voorgeskryf is deur die Departement Onderwys en Opleiding vir Standerd 10) en ’n handleiding oor “Ciske” van Piet Bakker. Verder is hy ’n medewerker aan ’n aantal boeke, soos “Perspektief en Profiel” onder redaksie van H.P. van Coller (waarin hy die profiel oor J.F.W. Grosskopf skryf) en “Tuinprovinsie Natal” onder redaksie van C.J.M. Nienaber.

Publikasies wysig

Skrywer wysig

Jaar Publikasie
1973 Bus-stop
1986 Drie hoorspele deur N.P. van Wyk Louw (samesteller)
1987 Die rebellie van Lafras Verwey van Chris Barnard
Kanna hy kô hystoe van Adam Small
Poësie: Skakering
Prosa: Ciske

Samesteller wysig

Jaar Publikasie
1973 Sewentiger G.S. Nienaber
1978 Poort 1978 (saam met C.J.M. Nienaber en M. Nienaber-Luitingh)

Bronne wysig

Boeke wysig

  • Brink, André P. “Aspekte van die nuwe drama” Academica Pretoria en Kaapstad Tweede hersiene uitgawe 1986
  • Cloete, T.T. (red.) “Die Afrikaanse literatuur sedert sestig” Nasou Beperk Eerste uitgawe 1980
  • Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005
  • Nienaber, C.J.M. (redakteur) “Tuinprovinsie Natal” Tafelberg Uitgewers Beperk Kaapstad Eerste uitgawe 1977
  • Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998

Ongepubliseerde Dokumente wysig

Ander Verwysings wysig

  1. 1,0 1,1 Worldcat: http://www.worldcat.org/identities/lccn-no2008058298/
  2. Brink, André P. “Rapport” 10 Februarie 1974