Gereformeerde kerk Steynsrus
Die Gereformeerde kerk Steynsrus was die naasjongste gemeente in die GKSA se Klassis Oos-Vrystaat, maar het in 2011 ontbind nadat hier reeds in 2001 net 13 belydende en ses dooplidmate oorgebly het, vergeleke met onderskeidelik 28 en 12 vier jaar vantevore. Nog vier gemeentes het in daardie jaar ophou bestaan: Krugersdorp-Oos (gestig in 1978), Noordbrug (1957), Potchefstroom-Noord (1949, met Noordbrug saamgesmelt as Die Bult) en Westonaria (1961). Twee jaar ná Steynsrus het ook die naasoudste gemeente in die Klassis Oos-Vrystaat, Tweespruit, ontbind toe ook daar net sowat 13 belydende lidmate oor was.
Die geskiedenis van die Gereformeerde kerk Steynsrus is nou vervleg met dié van die Gereformeerde kerk Lindley. Op 3 Januarie 1911 het 'n groep lidmate van die NG gemeente Lindley byeengekom aan huis van P.C. Oosthuizen om vas te stel hoeveel bereid was om hulle lidmaatskap van die NG Kerk te beëindig weens allerlei besware. Op 'n gemeentevergadering op 25 Maart 1911 op die plaas Klipdrif is saam met Steynsrus 'n gemeente gestig wat sou bekendstaan as die Gereformeerde Kerk onder die Kruis. In 1913 of '14 sou hulle met die Gereformeerde Kerk verenig.
Op 'n gemeentevergadering op Steynsrus op 22 Oktober 1912 is besluit om 'n kerkgebou op Steynsrus op te rig. Met 'n volgende vergadering is besluit om die kerkgebou liewer op Lindley te bou. In 1916 het die Steynsrus-wyk amptelik tot stand gekom en is daar met die oprigting van 'n kerkgebou begin. P.C. Oosthuizen het 'n pastorie aan die gemeente geskenk. Die predikant van die Gereformeerde kerk Lindley het op Steynsrus gewoon. Later is albei geboue verkoop en die predikant het op Lindley gaan woon. In 1952 is ’n nuwe kerkgebou op Steynsrus in gebruik geneem, maar eers in 1983 is die Gereformeerde kerk Steynsrus amptelik afgestig.
Predikant
wysigBronne
wysig- Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
- Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
- Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.