Gereformeerde kerk Upington

Die Gereformeerde kerk Upington is die sewende oudste van die 15 gemeentes in die GKSA se Klassis Griekwaland-Wes. Einde 2015, toe hier 70 belydende en 14 dooplidmate was, was dit ook die sewende kleinste gemeente in dié Klassis. In 2001 was die getalle onderskeidelik 152 en 45, ’n afname van meer as 57 persent binne 14 jaar.

Gereformeerde Kerk Upington
Sluit in	Aggeneys Groblershoop Kakamas Kanoneiland Keimoes Kenhardt
Klassis	Griekwaland-Wes
Huidige predikant(e)	M.P. (MP) Fourie (hulpdiens)
Belydende lidmate	93
Dooplidmate	28
Adres	Schröderstraat 145 Upington
Geskiedenis
Stigtingsdatum	17 Januarie 1959
Afgestig van	Olifantshoek
Eerste predikant	W.J. van der Westhuizen (1960–'64)

Die vooraansig van die Gereformeerde kerk Upington. Dié kerk is in gebruik geneem op 10 Junie 1961.

'n Syaansig van kerk.

Student Frans van der Walt trou op 15 Januarie 1965 met Johannatjie du Toit.

Dr. Frans van der Walt, die leraar van 1966 tot 1970 (sy eerste gemeente en die gemeente se eerste predikant), toe hy in 1965 aangewys is as voorsitter van die PU vir CHO se studenteraad.

Dr. Frans en mev. Johannatjie van der Walt se eersteling het drie weke laat opgedaag. Van der Walt kon sy vrou Sondagaand, 13 Maart 1966, hospitaal toe neem en moes toe vinnig van Pretoria na Upington vertrek om betyds te wees vir sy bevestiging die volgende Sondag, 20 Maart.

Ds. W.J. van der Westhuizen het die kerk se gedenksteen onthul met die ingebruikneming van die gebou op 10 Junie 1961.

Die suidwestelike wyk van die Gereformeerde kerk Olifantshoek het vroeg in die eeufeesjaar van die Gereformeerde Kerk en wel op 17 Januarie 1959 afgestig as die Gereformeerde kerk Upington. Heel gou het die nuwe gemeente planne begin maak om hul eie kerkgebou op te rig. R.B. Nyschen was die argitek sowel as die bouaannemer, en op 10 Junie 1961 is dié kerk in gebruik geneem. Destyds was dit amper die enigste gebou in ’n nuwe woonbuurt op Upington.

Omdat die gemeente in 1960 uit net 43 belydende en 32 dooplidmate bestaan het, is net die helfte van die gebou van banke voorsien wat ’n lidmaat, Abraham Viljoen, op sy plaas, 120 km van die dorp af, gemaak en dan na die dorp vervoer het. Die Kanselbybel was ’n geskenk van ds. M. Postma, leraar van die Gereformeerde kerk De Aar. ’n Lidmaat, Johannes Badenhorst, het die kanselstoel geskenk.

Die gemeentegrense beslaan ’n reusegebied en sluit onder meer ook die dorpe Aggeneys, Groblershoop, Kakamas, Kanoneiland, Keimoes, Kenhardt en Pofadder in.

Predikante

1. Van der Westhuizen, W.J., 1960 – 1964
2. Du Plooy, J.S., 1964 – 1966
3. Van der Walt, dr. Francois, 1966 – 1970
4. Steyn, dr. Diederick Johannes Schutte, 1972 – 1977
5. Saayman, Willem Jacobus Kruger, 1978 – 1981
6. Erasmus, Johannes Jacobus, 1981 – 1991 (aanvaar sy emeritaat)
7. Venter, Archibald, 1991 – 2000
8. Venter, Jan Daniël Philippus, 2001 – 2003 (sedertdien nie 'n voltydse predikant nie)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.