Mbiyamitirivier

Die Mbiyamitirivier is 'n rivier in die verre suide van die Krugerwildtuin, in Mpumalanga, Suid-Afrika. Die opvangsgebied ontvang 'n neerslag van 500 tot 600 mm per jaar, en die monding is aan die noordoewer van die Krokodilrivier oorkant sirkelbesproeiingslanderye en die nabye Marlothpark. Die rivier is oorwegend 'n klein stroompie op 'n breë sandbedding wat uit Ecca-skalie verweer is. Mbiyamiti is 'n Tsonganaam wat omheinde statte in herinnering roep. Die eMlambenirivier se samevloeiing met die Krokodil is 13 km stroomop, en die Bumespruit se samevloeiing 2,6 km stroomaf.

Mbiyamitirivier
Uitsig oor die rivier in die Krugerwildtuin. Uitsig oor die rivier in die Krugerwildtuin.
Stroomgebied	Mpumalanga, Suid-Afrika
Monding	Krokodilrivier
Monding-hoogte	198 m
Stroomgebiedopp.	Krugerwildtuin
Mbiyamitirivier
Koördinate: 25°10′59″S 31°18′39″O

Flora en geologie

Langs die rivieroewers groei ondermeer jakkalsbessies en trosvye, waarvan groot eksemplare by Biyamiti-bosveldkamp aangetref word. Deur die vlaktes weerskante van die S139-rivierpad loop 'n band van relatief sagte Ecca-skalie noord- en suidwaarts deur die laeveld, wat ook plaaslike riviere se vloeirigting beïnvloed. Die eiesoortige veldtipe op hierdie substraat beslaan slegs 3% van die wildtuin en word die Delagoa-ruigtes genoem. Die ruigtes word oorheers deur Delagoadorings en meerstamvalsdorings, met swartapiesdorings plek-plek.

Verblyfplekke

Op die regteroewer, net stroomop van die H3-toeristeroete, word die Jock Safari Lodge en Fitzpatricks Lodge deur private konsessiehouers bedryf. Stroomaf, 5 km van die Krokodilsamevloeiing, is die relatief klein Biyamiti-bosveldkamp ook op die regteroewer geleë. Dit word deur Sanparke bestuur en bestaan uit slegs vyftien selfsorg-akkommodasie-eenhede, sonder 'n restaurant of winkel. Die 22 km lange S139-rivierpad wat dit met die buitewêreld verbind is vir die uitsluitlike gebruik van Biyamiti-gaste. Begeleide staptogte en dag- en nagritte kan ook bespreek word, en die uitkykpunt sowat 2 km van die kamp bied vergesigte oor die omgewing. Digby die S139 se aansluiting met die S114-roete is die Biyamiti-keerwal, waarvan die standhoudende rotspoele veral in droër tye 'n bestendige toeloop van dier- en voëllewe verseker.

Sytakke

• Mitomenispruit
• Meetsemohlaba
• Matimachwewu
• Mtlhowa
• Mahlambamadube
• Siphampanane
• Dabidabi
• Komapiti
• Mhukweni
• Samarhole
• Napispruit
• Shitlhavespruit

Monding

• 25.18297°S 31.31088°O / -25.18297; 31.31088

Fotogalery

• 
  Dierelewe naby Biyamiti-bosveldkamp
• 
  Shitlhavedam in die Shitlhavespruit, 'n Mbiyamiti-boloop
• 
  Vervoerdam in die Siphampananespruit, 'n boloop van die Mbiyamiti

Eksterne skakel

• Google-kaart van die Mbiyamitirivier se monding by Geonames.org (cc-by)

Verwysings

Hierdie artikel is (gedeeltelik) vertaal uit die Cebuano Wikipedia. Sien bron.