Mick Schumacher (Vufflens-le-Château, Switserland, 22 Maart 1999)[1][2] is 'n Duitse renjaer wat in die Formule Een-kampioenskapsreeks vir die Haas F1-span jaag en ook lid is van die Ferrari Driver Academy. Hy begin sy loopbaan in knortjorre (karting) in 2008 en vorder tot die Duitse ADAC-formule 4 in 2015. Nadat hy die FIA F3 Europese kampioenskap in 2018 gewen het, het Schumacher in 2019 tot Formule 2 gevorder en die daaropvolgende jaar die Formule 2-kampioenskap gewen. In 2021 skuif hy op na Formule Een vir Haas.

Mick Schumacher
Mick Schumacher - 2019202181015 2019-07-21 Champions for Charity - 1500 - B70I1535.jpg
Geboortedatum 22 Maart 1999 (1999-03-22) (22 jaar oud) [1][2]
Geboorteplek Vufflens-le-Château, Switserland
Nasionaliteit Vlag van Duitsland Duitser
Verwant aan Michael Schumacher (vader)
Ralf Schumacher (oom)
Span in 2021 Haas F1
Motornommer 47
Inskrywings 11 (110 begin)
Kampioenskappe 0
Oorwinnings 0
Podiums 0
Loopbaanpunte 0
Voorste wegspronge 0
Vinnigste rondtes 0
Eerste F1-wedren 2021 Bahreinse Grand Prix

Persoonlike leweWysig

Schumacher is die seun van Michael Schumacher, die sewemalige Formule Een-wêreldkampioen, en die Westerse Europese ruiterkampioen, Corinna Schumacher. Sy oom Ralf Schumacher is 'n afgetrede renjaer en sy neef David Schumacher is ook 'n renjaer. Schumacher is gebore en het grootgeword in Switserland, het tot 2008 in Vufflens-le-Château gewoon, en daarna in Gland.[3] Schumacher is die neef van Sebastian Stahl, en kleinseun van Elizabeth en Rolf Schumacher.

Schumacher het saam met sy pa geski toe Michael op 29 Desember 2013 lewensgevaarlike breinbeserings opgedoen het. In Maart 2017 het Mick die eerste keer in die openbaar oor sy vader gepraat en hom beskryf as 'my afgod' en 'my rolmodel'.[4]

Voor die aanvang van die Belgiese Grand Prix 2017 het hy sy vader se Benetton B194-kampioenskapbekroonde renmotor bestuur. Hy het nog een van sy pa se kampioenmotors, die Ferrari F2004, bestuur tydens 'n demonstrasie voor die Toskaanse Grand Prix in 2020 in Mugello, om Scuderia Ferrari se 1000ste Formule Een-ren te vier, terwyl hy sy vader se valhelm vir die geleentheid gedra het.[5]

LoopbaanWysig

Schumacher het sy motorsportloopbaan in 2008 begin. Om openbare aandag vanweë sy beroemde vader te vermy, het hy sy loopbaan onder die skuilnaam 'Mick Betsch' begin en sy ma se nooiensvan gebruik.[6]

KnortjorreWysig

In 2011 en 2012 ry Schumacher in die KF3-klas van die ADAC Kart Masters en eindig onderskeidelik in die 9de en 7de plek. In die Euro Wintercup van die KF3-klas was hy 3de in 2011 en 2012 en in 2012 3de in die KF3 Rating DMV Kart-kampioenskap. In 2013 eindig hy 3de in die Duitse Junior Kart-kampioenskap, en die CIK-FIA Super Cup KF juniors. In 2014 gebruik Schumacher die naam 'Mick Junior', [6] begin in die Internasionale en Nasionale Junior Kampioenskappe, en eindig die seisoen 2de in die Duitse Junior Kart-kampioenskap,[7] asook in die Europese en Wêreldkampioenskap.[8][9] Alhoewel hy nie onder sy regte naam in karting gejaag het nie, het die internasionale pers dadelik sy suksesse in karting bespeur en dit gepubliseer.[10][11]

Formule 4Wysig

 
Schumacher neem deel aan die ADAC Formula 4 vir Van Amersfoort Racing in 2015

Aan die einde van 2014 voltooi hy toetsritte vir Jenzer Motorsport in 'n Formule 4-renmotor.[12] In 2015 het Schumacher vir die eerste keer in formuleklasse begin jaag en vir Van Amersfoort Racing in die ADAC Formule 4 gejaag, onder sy Schumacher-naam.[13][14][15] In 2016 bly Schumacher in die ADAC Formule 4, maar skakel oor na Prema Powerteam,[16] 'n span wat bekend is vir sy noue bande met die Ferrari Driver Academy. Hy het ook aan die Italiaanse F4-kampioenskap deelgeneem en in albei kampioenskappe onderskeidelik vir Joey Mawson en Marcos Siebert geklop.

Formule 3Wysig

In November 2016 het Schumacher sy eerste verskyning in Formule 3-masjinerie gemaak deur aan die MRF Challenge, 'n kampioenskap in Indië, deel te neem. Hy het aan die boonste Formule 2000-klas deelgeneem en die reeks in die 3de plek afgesluit met vier oorwinnings, nege podiums en twee voorste wegspronge. Schumacher eindig agter Harrison Newey en Joey Mawson, maar voor sy toekomstige Formule 3- en Formule 2-kompetisie Jüri Vips en Felipe Drugovich.

 
Mick Schumacher tydens die FIA Formule 3 rondte by Norisring in 2018

In April 2017 maak Schumacher sy debuut in die FIA Formule 3 Europese kampioenskap vir die Prema Powerspan.[17] Hy het die seisoen in die 12de plek afgeluit met 'n beste 3de plek by Monza.[18] Schumacher was die laagsgeplaasde van die vier Prema-jaers, maar tog as die derde beste nuweling in die kampioenskap geplaas.

Schumacher het voortgegaan om vir Prema in die 2018-kampioenskap te jaag. Hy het 'n stadige begin in die seisoen gehad en uiteindelik sy eerste oorwinning eers in die vyftiende ren van die jaar op Spa-Francorchamps, amper halfpad deur die seisoen, behaal. Voor hierdie wedren, was hy in die 10de plek in die kampioenskap geplaas, 67 punte agter Dan Ticktum, die kampioenskapsvoorloper. Schumacher het egter die laaste helfte van die seisoen oorheers en nog sewe oorwinnings behaal, waaronder vyf agtereenvolgens. Hy eindig die seisoen as kampioen, 57 punte beter as Ticktum, met agt oorwinnings, veertien podiumplekke, sewe voorste wegspronge en vier vinnigste rondtes.

Formule 2Wysig

 
Schumacher jaag in die Formule 2 rondte te Spielberg in 2019

Schumacher het in 2019 na die FIA Formule 2-kampioenskap opgeskuif, as spanmaat van Sean Gelael by Prema Racing.[19] In die eerste ronde van die seisoen in Bahrein, het Schumacher 10de weggespring en 8ste klaargemaak, nadat hy Nobuharu Matsushita in die laaste rondte verbygesteek het, dit het hom die omgekeerde-rooster voorste wegspringposisie vir die naelren gegee, waarin hy 6de gekom het. Schumacher het vanaf 7de weggespring in die voorwedren in Baku, maar is na 'n tolslag gedwing om te onttrek. Hy het van die 19de tot die 5de plek in die naelloop herstel. Hy het nie daarin geslaag om punte by Barcelona aan te teken nie, terwyl hy in die eerste ren 'n botsing gehad het en 'n tydstraf ontvang het vir 'n onwettige verbysteek van Jack Aitken in die tweede ren. In Monaco het Schumacher met verskeie motors gebots en die rooi vlag het verskyn. Hy sou in geen van beide wedlope punte behaal nie. 'n Dubbele onttrekking het by die Circuit Paul Ricard gevolg, nadat hy in die eerste ren in 'n botsing met spanmaat Gelael betrokke was en in die tweede ren 'n pap band gekry het.

Schumacher het by die Red Bull Ring die motor op die rooster laat stol en eindig in die 18de plek voordat hy in die naelloop vinnig deur die veld vorder om 4de te eindig. In die naelloop op Silverstone het hy 6de gekom. Hy het 'n agtste plek behaal tydens die vertoonren in Hongarye, en het vir die naelloop sy voorste posisie behou om sy eerste oorwinning in Formule 2 te behaal. Schumacher het 6de gekwalifiseer by Spa-Francorchamps, maar albei wedrenne is afgelas weens 'n ongeluk wat die dood van Anthoine Hubert veroorsaak het. Op Monza het hy 'n kragprobleem ondervind en onttrek, maar hy het herstel om 'n sesde plek in die naelloop te eindig, en ook die vinnigste rondte te behaal. Hy het uit albei renne in Rusland getree, na 'n enjinprobleem in die eerste en 'n botsing met Giuliano Alesi in die tweede. Schumacher eindig die seisoen met die 9de en 11de plek in Aboe Dhabi. Hy eindig die seisoen in die 12de plek in die kampioenskap met 53 punte, aansienlik ver voor spanmaat Gelael, en behaal een oorwinning en een vinnigste rondte.

Hy het voortgejaag vir Prema in die FIA Formule 2-kampioenskap in 2020, saam met die heersende FIA Formula 3-kampioen en mede-lid van die Ferrari Driver Academy, Robert Shwartzman. In die ren in Oostenryk het hy die baan verlaat terwyl hy en Callum Ilott in 'n stryd om die voorsprong gewikkel was. In die tweede ronde op dieselfde baan het sy brandblusser in die naelren afgegaan. In Hongarye het Schumacher met 'n dubbele podium teruggebons. Daarna het hy vyf agtereenvolgende podiums van Spanje na Monza behaal, insluitend 'n oorwinning in die vertoonwedren op Monza, en die kampioenskapvoorsprong op Mugello behaal. Hy het die volgende ronde in Rusland gewen en derde gekom in die naelloop wat verkort is weens 'n ongeluk tussen Luca Ghiotto en Jack Aitken.

By die Bahrein-ronde kwalifiseer hy in die 10de plek en klim tot die 4de plek in die voorwedren. Hy eindig 7de in die naelren. Dit het tot gevolg gehad dat Callum Ilott die agterstand tot 14 punte in die laaste ronde op die buitebaan kon verminder.

In Sakhir behaal Schumacher sy loopbaanswakste 18de plek na 'n voorval met Roy Nissany. Hy behaal 'n goeie herstel tot 6de plek met die vinnigste rondte. Dit het beteken dat die puntegaping in die finale ren dieselfde gebly het. In die naelren het Schumacher sy bande pap geslyt terwyl hy om die voorsprong veg, wat daartoe gelei het dat hy Ilott vir die eerste helfte van die ren afgeweerhet. Na nog 'n paar remsluite, het hy vir sagte bande geruil wat hom uit die punte laat val. As gevolg van sterk aanvalle en verdediging het Ilott se bande nie veel beter gevaar nie en hy het ook stadig uit die punte geval. Hierdie uitslag bevestig Schumacher as die FIA Formule 2-kampioen in 2020.

Formule 1Wysig

Schumacher is op 19 Januarie 2019 as 'n renjaer ingeneem by die Ferrari Driver Academy. Schumacher het in sy pa se voetspore gevolg en Ferrari se grootste deel van sy hart en die spesiale bande met die span in sy gesin van kleins af aangehaal as 'n belangrike deel van sy toetrede tot die span se akademie. Op 2 April 2019 het Mick Schumacher sy debuut agter die stuur van 'n moderne Formule 1-motor gemaak en Scuderia Ferrari se SF90 tydens die eerste dag van die midseisoentoetsing by Bahrein Internasionale Renbaan as die enigste debutant in die veld bestuur. Tydens die oggendsessie het Schumacher 'n persoonlike beste tyd van 1:32.552 tydens sy 30 rondtes aangeteken, wat hom die sesde vinnigste jaer die dag gemaak het nadat reën die sessie twee keer onderbreek het. Die res van die dag het Schumacher nog 26 rondes ingespan om 'n beste tyd van 1:29.976 op die sagste beskikbare bande op te stel, wat die vinnigste tyd gebly het totdat Max Verstappen van Red Bull Racing 'n rondte van 1:29.379 vyf minute later aangeteken het.[20][21] Na Dinsdag se toetssessie het Schumacher gesê dat hy tuis voel by Scuderia Ferrari en sy eerste rit geniet het.

'Ek het dit baie geniet vandag,' het hy gesê. 'Dit het van die eerste oomblik af soos 'n tuiste in die motorhuis gevoel, met baie mense wat my al van jongs af ken. Die SF90 is ongelooflik vanweë die krag wat dit bied, maar dit is ook glad om te bestuur, en daarom het ek myself so geniet.' Schumacher het bygevoeg dat hy beindruk was met die remkrag van 'n moderne F1-motor. 'Dit het vir my gelyk of jy later en later kan rem, en die motor sou in elk geval die draai kon maak. Ek wil Ferrari bedank vir hierdie ongelooflike geleentheid.'[22][23] Schumacher sou die volgende dag in die seisoen vir Alfa Romeo Racing gaan toets.

Schumacher sou sy Formule Een-oefendebuut in die 2020 Eifelse Grand Prix se eerste oefensessie maak, en vir Alfa Romeo Racing in die plek van Antonio Giovinazzi gery het. As gevolg van slegte weerstoestande is die sessie gekanselleer, wat beteken dat hy nie gejaag het nie.

Op 2 Desember 2020 word dit bekend gemaak dat Mick Schumacher in 2021 vir die Haas F1-span in Formule 1 sal jaag, saam met nuwe spanmaat Nikita Mazepin.[24] Op 11 Desember 2020 neem hy die eerste keer as toetsrenjaer deel tydens die eerste vrye oefening van die 2020 Aboe Dhabi Grand Prix vir Haas.

VerwysingsWysig

  1. 1,0 1,1 "Mick Schumacher is born". Verstappen Info Page. 25 Maart 1999. Besoek op 26 Maart 2015.
  2. 2,0 2,1 "Schumacher, Mick Germany – ADAC Formel 4 Driver 2015". ADAC Formel 4. Besoek op 24 April 2015.
  3. "Mick Facts – Career". mickschumacher.ms. Besoek op 1 November 2016.
  4. Mick Schumacher declares father Michael as his idol – Autoweek, 29 Maart 2017
  5. "Mick Schumacher drives Michael's 2004 Ferrari at Tuscan Grand Prix". ESPN.com. 13 September 2020. Besoek op 2 Oktober 2020.
  6. 6,0 6,1 "Schumacher-Sohn Mick: Großer Name, große Erwartungen (Duits)". Der Spiegel. 23 September 2014. Besoek op 2 Maart 2015.
  7. "Deutsche Junior-Kart-Meisterschaft 2014" (PDF) (in Duits). kart-dm.de. Besoek op 2 Maart 2015.
  8. "Result FIA CIK Karting European Championship 2014" (PDF). FIA-CIK-Homepage. Besoek op 2 Maart 2015.
  9. "Result FIA CIK Karting World Championship 2014" (PDF). FIA-CIK-Homepage. Besoek op 2 Maart 2015.
  10. "Schumi jr vice iridato nei kart: "Ma io voglio il Mondiale" (Italian)". gazetta.it. 22 September 2014. Besoek op 2 Maart 2015.
  11. "Mick Schumacher vice-champion du monde (French)". L'Équipe. 22 September 2014. Besoek op 2 Maart 2015.
  12. "Mehr Motorsport – Mick Schumacher testet im Formelauto" (in Duits). Aufstieg in den Formelsport?: Motorsport-Magazin.com. 16 Desember 2014. Besoek op 2 Maart 2015.
  13. "ADAC Formel 4 – Mick Schumacher fährt für Van Amersfoort Racing" (in Duits). Einstieg in den Formelsport perfekt: Motorsport-Magazin.com. 3 Februarie 2015. Besoek op 3 Februarie 2015.
  14. "Nachwuchspilot: Schumacher-Sohn Mick startet in der Formel 4". Der Spiegel (in Duits). 2 Maart 2015. Besoek op 2 Maart 2015.
  15. "Michael Schumacher's son Mick signs deal to race in Formula 4". BBC. 2 Maart 2015. Besoek op 3 Maart 2015.
  16. Medland, Chris (19 Februarie 2016). "Schumacher moves to Prema in F4". F1i. Chris Medland. Besoek op 19 Februarie 2016.
  17. Simmons, Marcus (24 Desember 2016). "Mick Schumacher confirms 2017 European F3 campaign with Prema". Autosport. Besoek op 11 Januarie 2017.
  18. Michael Schumacher's son "has a lot to learn" after finishing 12th in maiden F3 season – Ross Logan, Daily Express, 17 Oktober 2017
  19. "Mick Schumacher to compete in F2 with Prema Racing in 2019". Besoek op 27 November 2018.
  20. "2019 Bahrain F1 Test Live". Crash. Besoek op 3 April 2019.
  21. "Mick Schumacher pipped by Verstappen to fastest time in Bahrain F1 test". Formula One. Besoek op 3 April 2019.
  22. "Mick Schumacher second fastest at Bahrain F1 test in Ferrari". 2 April 2019. Besoek op 3 April 2019.
  23. Richards, Giles (2 April 2019). "'It felt like home': Mick Schumacher second in testing on maiden F1 drive". The Guardian. ISSN 0261-3077. Besoek op 3 April 2019.
  24. (nl) "Opnieuw een Schumacher in de Formule 1: Mick krijgt zitje bij Haas". Sporza. 2 Desember 2020. Besoek op 2 Desember 2020.