NG gemeente Krugersdorp

Die NG gemeente Krugersdorp was die moedergemeente van die Nederduitse Gereformeerde Kerk in Krugersdorp, maar is in 2010 ingelyf by die NG gemeente Luipaardsvlei.

Die kerkgebou, Januarie 2018.

Die kerkgebou van die NG gemeente Krugersdorp omstreeks 1917.

Ds. H.C.J. Becker was van 1890 tot vroeg in 1898 Krugersdorp se eerste NG leraar. Van Februarie 1898 tot September 1914 was hy leraar van die NG gemeente Bethulie. In sy dienstyd daar is amper 1 500 vroue en kinders van die konsentrasiekamp op Bethulie in die kampkerkhof begrawe. Hy het in 1903 'n weesinrigting opgerig vir die wesies van die Tweede Vryheidsoorlog.

Die kerkgebou in 2012.

Ds. Gustav Radloff was leraar van Krugersdorp van 1898 tot hy sy emeritaat in 1914 aanvaar het. Hy is op 4 Oktober 1928 oorlede en was getroud met 'n dogter van ds. Bamberger, die eerste leraar van die NG gemeente Fraserburg.

Ds. P.J. van Vuuren was leraar van Krugersdorp van 1915 tot 1921. Hy het van 1921 tot 1928 op Vredefort gearbei en daarna tot sy dood op 23 Januarie 1939 op Edenville, ook in die Oranje-Vrystaat.

Ds. Jacobus Joubert Krige was leraar van Krugersdorp van 21 April 1922 tot sy dood op 29 Oktober 1936.

Ds. P.W. Marais, medeleraar van 1954 tot 1955.

Voor 1890 het die lidmate van die NG Kerk in hierdie gebied onder die gemeente Pretoria geressorteer. Op 7 Junie 1890 is die gemeente Krugersdorp afgestig en is prop. Becker as leraar op 6 September 1890 bevestig. Die kerkgebou, wat al die jare in gebruik was, is in Januarie 1895 ingewy. Ds. Becker se opvolger was ds. F.G.T. Radloff van Hoopstad wat op 17 Desember 1898 hier bevestig is. Tydens sy bediening het hierdie gemeente, weens die oorlog en naoorlogse ellende, donker dae deurleef. Besonder veel is deur hierdie getroue dienskneg van die Here en deur sy gade ter ondersteuning van die noodlydendes in die konsentrasiekamp asook die krygsgevangenes op die dorp gedoen. Hy het nie net hul geestelik bearbei nie, maar onder sy leiding is 'n kommissie in die lewe geroep wat in die noodsaaklikste behoeftes van die noodlydendes in die kamp en dorp voorsien het.

Nadat ds. Radloff op 11 Oktober 1914 sy emeritaat aanvaar het, is hy opgevolg deur ds. P.J. van Vuuren, wat die gemeente van 1915 tot 1921 gedien het, en toe 'n beroep na Vredefort aangeneem het. Onder sy ywerige leiding is die knellende kerkskuld gedelg.

Die volgende leraar van die gemeente was ds. J.J. Krige wat op 21 April 1922 hier bevestig is. Veertien jaar lank het hy in die gemeente gearbei, totdat hy onverwags op 29 Oktober 1936 tot hoër diens opgeroep is. In November 1937 is ds. A.T. Martinson in die gemeente bevestig. Op 29 November 1941 is ds. C.C. van Dyk as eerste medeleraar van die gemeente bevestig. In 1944 is hy na die jongste dogtergemeente, Krugersdorp-Noord, beroep.

Danksy die ywer van die verskillende leraars en in besonder dié van ds. Martinson het die gemeente sy plek t.o.v. die sending, armesorg, Sondagskool, kerklike verenigings en onderwys volgestaan. Met die snelle ontwikkeling van die Wes-Rand, het die ledetal van die gemeente herhaaldelik so toegeneem dat die volgende dogtergemeentes afgestig moes word: Roodepoort in 1905, Magaliesburg in 1910, Randpoort (Randgate) in 1918, Burgershoop (Krugersdorp-Wes, later genoem Suiderlig) in 1920, Krugersdorp-Noord in 1943.

Die moedergemeente van die Ring van Krugersdorp het in 1952 'n ledetal van nagenoeg 1 350 gehad, terwyl die kerkraad 56 getel het. Prop. T.J. Hanekom is in Oktober 1951 tot medeleraar van die gemeente bevestig.

Nes die moedergemeentes van Klerksdorp, Alberton, Germiston, Boksburg en Randfontein, het Krugersdorp se lidmate so afgeneem dat die gemeente by 'n buurgemeente ingelyf is, in dié geval in 2010 by Luipaardsvlei.

Enkele leraars

• H.C.J. Becker, 6 September 1890 – 1898
• F.G.T. Radloff, 17 Desember 1898 - 11 Oktober 1914 (hy aanvaar sy emeritaat)
• P.J. van Vuuren, 1915 - 1921
• Jacobus Joubert Krige, 21 April 1922 - 29 Oktober 1936 (oorlede in die amp)
• Archibald Thomas Martinson, 1937 - ?
• C.C. van Dyk, 29 November 1941 – 1944 (word eerste leraar van die dogtergemeente Krugersdorp-Noord)
• T.J. Hanekom, Oktober 1951 (medelelaar)
• Pieter Willem Marais, 1962– 1964

Bron

• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.