Naas Botha

Naas Botha
	Naas Botha, 1987
Volle naam	Hendrik Egnatius Botha
Geboortedatum	27 Februarie 1958 (66 jaar oud)
Geboorteplek	Breyten, Suid-Afrika
Lengte	1,79 m
Massa	78 kg
Skool	Hoërskool Hendrik Verwoerd
Universiteit	Universiteit van Pretoria
Eggenote	Karen
Beroep	Sakeman
Rugbyloopbaan
Loopbaan as speler
Posisie(s)	Losskakel
Springbokno.	502
Amateurspanne
Professionele / senior klubs
korrek soos op 11 Augustus 2014.
Provinsiale- / Staatspanne
korrek soos op 11 Augustus 2014.
Nasionale span(ne)
korrek soos op 11 Augustus 2014.

Naas Botha (1958–) is 'n voormalige Springbok-losskakel (in 28 toetse, 1980–1992) en -kaptein (in 9 toetse, 1986–1992) wat ook vir Noord-Transvaal gespeel het. Hy was gedurende die 1970’s en 1980’s bekend as 'n puntemasjien en 'n wedstrydwenner sonder weerga.^[1] Hy het verskeie provinsiale en Springbok-punterekords opgestel, waarvan die meeste intussen verbeter is. Hy was Suid-Afrika se veertigste Springbokkaptein en is met die voormalige Olimpiese verspringatleet, Karin (neé Kruger) Botha, getroud. Hy is deesdae bekend as 'n rugbykommentator.

Kinderjare

Hendrik Egnatius Botha is op 27 Februarie 1958 in Breyten gebore en het in Pretoria grootgeword. As negejarige klim hy en sy vriende laat op 'n Vrydagaand skelm oor die heining van Loftus Versfeld en slaap in die toilet om te sien hoe die Blou Bulle in 1967 vir Frankryk wen. Hy toer twee keer saam met die Suid-Afrikaanse onder-16-bofbalspan deur Europa. Hy verteenwoordig ook die Suid-Afrikaanse Universiteitespan in bofbal en word vir die Noord-Transvaalse Hoërskole-rugbyspan gekies. Nadat hy gematrikuleer het, gaan studeer hy by Tukkies waar hy vir die Noord-Transvaalse onder-20-span speel.

Rugbyloopbaan

Hy speel reeds as negentienjarige in 1977 vir Noord-Transvaal. Hy maak sy internasionale buiging vir die Springbokke teen die Suid-Amerikaanse Jaguars op 26 April 1980 en word Noord-Transvaal se kaptein – as 'n twee-en-twintigjarige. Hy is in 1979, 1981, 1985 en 1987 as Suid-Afrika se "Speler van die Jaar" aangewys.

In 1977, 1978, 1980 en 1981 was hy deel van die Noord-Transvaalspanne wat die Curriebeker verower het. In 1979 deel hulle die beker met die Westelike Provinsie. Hy speel ook in die twee toetse teen die All Blacks en Wallabies in Suid-Afrika en sluit sy internasionale loopbaan op die toer aan die einde van 1992 na Engeland en Frankryk af.

Statistiek

Naas het in 28 toetse gespeel waarin hy 312 punte aangeteken het – 'n Suid-Afrikaanse rekord. Hy was ook kaptein in nege van die 28 toetse. Die punte bestaan uit:

2 drieë
50 doelskoppe
50 stafskoppe
18 skepskoppe

Sy eersterangse loopbaan lees soos volg:

273 wedstryde
216 gewen
49 verloor
8 gelykop
Hy teken 3 734 punte aan wat 209 skepskoppe insluit.

Verwysings

↑ HAT Taal-en-feitegids, Pearson, Desember 2013, ISBN 978-1-77578-243-8

Bron

Dobson, Paul. 30 Super Springboks. 1995. ISBN 0-7981-3411-9

Eksterne skakels

Naas Botha by www.genslin.us/bokke

Voorafgegaan deur Divan Serfontein	Springbokkaptein 1986-1989	Opgevolg deur Jannie Breedt

[HAT_Taal-en-feitegids-1] HAT Taal-en-feitegids, Pearson, Desember 2013, ISBN 978-1-77578-243-8

[1]