Dana Niehaus

Daniël Retief (Dana) Niehaus (21 Desember 1918 – 12 Oktober 1995) was ‘n Suid-Afrikaanse omroeper en akteur.

Loopbaan

Dana Niehaus het as omroeper by Springbokradio gewerk. Hy was ook die eerste persoon wat Afrikaanse krieketkommentaar gelewer het, en het van die krieketterme wat vandag algemeen gebruik word, geskep.

Sy loopbaan as akteur het in 1959 begin met Satanskoraal, die eerste Afrikaanse rolprent met tonele wat onder die water verfilm is. Daarna het hy in rolprente soos Rip van Wyk, Huis op horings, Vicki, Ma skryf matriek en Jakkalsdraai se mense gespeel.

Aan die beginjare van Suid-Afrikaanse televisie het Dana in ’n aantal reekse gespeel. Hy was die polisieman wat teenoor Tobie Cronjé en Katinka Heyns in Willem gespeel het, en hy was ook te sien in TJ 7, die laaste televisiereeks waarin Wena Naudé gespeel het voordat sy oorlede is. Hy het die rol van Koos Vermaak in die reeks Net ’n bietjie liefde teenoor Esmé Euvrard vertolk, en dié van Boela van der Merwe in die reeks Phoenix en Kie. Dit was sy laaste televisierol, hoewel hy later in rolprente soos Blink Stefaans, Verkeerde nommer en The Fourth Reich geseel het.

Dana was ook die stem van "Oom Flapoor Olifant" in Haas Das se Nuuskas en hy het die Jakkals-en-Wolf-stories wat deur Pieter W. Grobbelaar geskryf is, vertel. Hierdie stories is op langspeelplaat uitgereik en het ook op ‘n CD verskyn. Hy het ook ander langspeelplate met kinderstories vrygestel, onder meer Oom Dana Niehaus vertel wolhaarstories en Stout en soet.

Dana het ook ’n paar opnames as sanger gemaak, onder meer die album Dana Niehaus se Boerekonsert, waarin hy saam met orkesleiers soos Nico van Rensburg, Dirkie Smit en Manie Bodenstein opgetree het. Hierdie album het in 1983 verskyn en het twee oorspronklike liedjies opgelewer, naamlik “’n Boer maak ’n plan” en “Klein bietjie liefde”.

Dana se seun, Danie Niehaus, is ‘n bekende Afrikaanse sanger.

Bron

• FAK, Dana Niehaus (1918-1995), https://www.afrikanergeskiedenis.co.za/dana-niehaus-1918-1995/ - Besoek 26 Mei 2022.