Gereformeerde kerk Buffeldoorns

Die Gereformeerde kerk Buffeldoorns is ’n gemeente van die GKSA met sy middelpunt op die Wes-Randse dorp Fochville, maar dit sluit ook onder meer Oos-Driefontein, Deelkraal en Elandsrand in. Die gemeente se belydende lidmate het in 2015 183 getel en die dooplidmate 38.

Gereformeerde Kerk Buffeldoorns
Sluit in	Carletonville Elandsrand Fochville
Klassis	Potchefstroom
Huidige predikant(e)	Ds. Erasmus A. Venter
Belydende lidmate	126
Dooplidmate	40
Adres	Tulpstraat 15 Fochville
Geskiedenis
Stigtingsdatum	1949/14 Maart 1974
Afgestig van	Potchefstroom
Eerste predikant	J.V. Coetzee 1949–1952 N.G. Laubscher 1977–2006

Agtergrond

Die plaas Buffeldoorns is sowat 20 km wes van Fochville geleë. Die eienaar van dié plaas ten tyde van die stigting van die Gereformeerde Kerk, P.J.W. Schutte, was ’n kerkleier en het hom as Volksraadslid van 1850 tot 1873 onderskei. Hy is op 29 November 1805 (of 1803) in die distrik Uitenhage gebore en het hom omstreeks 1849 op Buffeldoorns kom vestig. Nadat hy van die Kaap na Durban gevaar het, het ds. Dirk Postma, die stigter van die Gereformeerde Kerke in Suid-Afrika, op Saterdag 7 November 1858 op Schutte se plaas aangekom. Op Sondag 8 November is die tweede Dopperpreek noord van die Vaalrivier in die opstal op Buffeldoorns gelewer, drie maande en drie dae voor die Kerk se stigting.

Nadat die Kerk op 11 Februarie 1859 op Rustenburg gestig is, het die wyk Mooirivier met 35 (of 36) lidmate tot stand gekom met Schutte as ouderling en P.A. Venter as diaken. Toe ds. Postma die Gereformeerde kerk Potchefstroom op 17 April 1863 stig, het Mooirivier ’n wyk van dié gemeente geword, hoewel die Almanak van die GKSA Potchefstroom se stigting aangee as 1859 en latere navorsing daarop dui 12 Februarie 1859 is wel dié gemeente se stigtingsdatum danksy die aanwysing van die eerste ouderling en diaken.

Eerste Buffeldoorns gestig

Amper 90 jaar later en wel in 1949 het Buffeldoorns van Potchefstroom afgestig met ’n lidmaattal van 174. Die eerste erediens van die nuwe gemeente is gebou in ’n plaasskooltjie, wat in onbruik verval het. Dit is dan ook later weens bouvalligheid gesloop. Namate die goudmyne in dié omgewing ontwikkel het, het die groeipunte ook gewissel. Nadat die myndorp Carletonville enkele kilometer wes van Fochville ontstaan het, is die Gereformeerde kerk Carletonville op 16 Mei 1953 gestig. Buffeldoorns het daarna te min lidmate oorgehad om sinvol op sy eie te bestaan en is in 1957 ontbind toe die lidmate by omliggende gemeentes ingeskakel het.

Tweede stigting

Op 19 Oktober 1959 (volgens die Almanak 1969) het die Gereformeerde kerk Carletonville-Oos afgestig. Kort hierna het talle sinkgate in die omgewing begin inval sodat mense weggetrek en die gemeente se lidmaattal so skerp afgeneem het dat Carletonville-Oos moes ontbind (in 1969 volgens een bron, maar volgens ’n ander in 1976). Destyds het Fochville die groei getoon wat eers van Carletonville verwag is. Nadat Carletonville-Oos ontbind het, het die ou naam Buffeldoorns herleef met die stigting van nog ’n gemeente met dié naam en wel op Fochville op 14 Maart 1974.

Ds. N.G. Laubscher was die gemeente se predikant van 1977 tot 2006. Onder sy leiding het die gemeente met ywer aan die werk gespring om ’n kerkgebou op te rig wat eindelik op 25 en 26 November 1978 in gebruik geneem is nadat ds. Laubscher die hoeksteen op 1 Julie daardie jaar gelê het. Die kerkraad het as eienaarbouer opgetree en die gebou se ontwerp is met ’n merieteprys bekroon.

Predikante

Eerste bestaanstyd

1. Coetzee, Jan Viljoen, 1949 – 26 Desember 1952 (in kombinasie met Potchefstroom)
2. Janse Van Vuuren, Cornelius Marthinus, 1954 – 1958 (in kombinasie met Carletonville)

Ná herstigting

1. Laubscher, Ds. Nicolaas Gerhardus, 1977 – 2006
2. Muller, Dr. Daniel Francois, 2006 – 2012
3. Pretorius, Ds. Rynhardt Jacobus, 2013 – 2017
4. Lemmer, Ds. Jaco, 2018 – 2023
5. Venter, Ds. Erasmus Albertus, 2024 – Hede

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.

Eksterne skakels

• (en) Die kerkgebou soos te sien op Google Maps. URL besoek op 4 Januarie 2016.