Gereformeerde kerk Magalakwin

Die Gereformeerde kerk Magalakwin is die sesde oudste van die 25 gemeentes in die GKSA se Klassis Limpopo.

Gereformeerde kerk Magalakwin
Sluit in	Alldays Mopani Vetfontein Waterpoort
Klassis	Limpopo
Huidige predikant(e)	Retief Gouws
In kombinasie met	Dendron
Belydende lidmate	80
Dooplidmate	31
Adres	Withaakstraat Alldays
Geskiedenis
Stigtingsdatum	1945
Afgestig van	Louis Trichardt
Eerste predikant	W.F. Venter 1946–1949

Toe die wyke wat sedert 1945 die Gereformeerde kerk Magalakwin vorm, nog deel van die Gereformeerde kerk Louis Trichardt was, het hulle self 'n kerk op Alldays gebou wat op 2 April 1932 in gebruik geneem is.

Buiten die plekkie Alldays waar die kerk staan, sluit die gemeente ook nedersettings soos Platjan, Dardanellen, Pontdrif en Soutpansberg in die noordweste van die provinsie Limpopo in asook Tuli in Botswana. Al het die gemeente einde 2015 net 74 belydende en 33 lidmate gehad kan hy, omdat hy in kombinasie met die Gereformeerde kerk Dendron met sy 78 belydende en 25 dooplidmate is, die diens van ’n voltydse predikant geniet.

Stigting

In 1930 het ene Cornelia Grobler van die Hervormde Kerk 2 morg grond op Alldays aan die wyk Brakrivier van die Gereformeerde kerk Pietersburg geskenk. Dié wyk het later deel geword van die Gereformeerde kerk Louis Trichardt en in 1945 afgestig as die Gereformeerde kerk Magalakwin.

Kerkbou

Dr. P.J. Pelser, leraar (in kombinasie) van 1956 tot 1961.

Reeds aan die begin van die dertigerjare het lidmate self aan die werk gespring en hul eie kerk gebou. Die hoeksteen is op 12 Desember 1931 gelê en die gebou is ingewy op 2 April 1932. Omdat ’n voordeur weens ’n tekort aan geld nog gekort het, is die ingang aanvanklik met doringtakke toegemaak. Later is genoeg geld ingesamel om ’n deur aan te bring. Dié kerk bied glo sitplek aan 200 kerkgangers, maar dié bewering is nog nooit getoets nie omdat Magalakwin in sy hele bestaan nog nooit so baie lidmate gehad het nie, want selfs in die bloeitydperk omstreeks 1960 was hier maar 66 belydende en 57 dooplidmate. Dié gebou, wat jare gelede tot nasionale gedenkwaardigheid verklaar is, is hoogs doelmatig, maar moes met die jare meermale opgeknap word weens die rousteen-samestelling.

’n Ruim saal, wat eers net ’n afdak agter die kerkgebou was, is later voltooi. Dit het eers vroeg in die 21ste eeu ’n plafon gekry en dit is hier waar lidmate Sondae bymekaarkom om gesellig te kuier.

Hoeksteen vervang

Die hoeksteen van 1931 het mettertyd verweer en tydens die restourasie aan die kerk van 2005 is dit vervang deur ’n nuwe steen met dieselfde bewoording as dié op die oue. Toe die ou steen uitgehaal word, is afgekom op vrugteflesse waarin ds. P.J. de Klerk, die eerste predikant en die hoeksteenlêer, se intreepreek in ’n boekie saamgevat is, ’n ou Gustav Preller-koerantjie met Danie Craven se foto daarby en skryfblok-afskrifte waarop die koste en materiaal aangebring is. Dié vonds word nou bewaar in ’n glaskas, wat spesiaal vir dié doel gemaak is. Agter die nuwe hoeksteen het 2005 se lidmate hul nalatenskap geplaas vir wie dit ook al eendag daar sal uithaal.

Predikante

1. Pelser, dr. Petrus Jacobus, 1956 – 1961 (in kombinasie met Louis Trichardt en Messina)
2. Kruger, dr. Stephanus Francois, 1978 – 1982 (in kombinasie met Messina)
3. Welding, Jozua Francois, 1983 – 1984 (in kombinasie met Messina)
4. Nagel, Cornelius Johannes, 1986 – 1992 (in kombinasie met Dendron)
5. De Kock, Jacobus Johannes, 1992 – 2002 (in kombinasie met Dendron; aanvaar sy emeritaat)
6. Venter, Petrus Jacobus, 2002 – 2009 (in kombinasie met Dendron)
7. Booyens, Daniël Jan Andries, 2009 – 2014 (in kombinasie met Dendron)
8. Tredoux, Jacques Gideon, 2015 – 2018 (in kombinasie met Dendron)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.