Gereformeerde kerk Queenstown

Die Gereformeerde kerk Queenstown is die negende oudste van die 17 gemeentes in die GKSA se Klassis Burgersdorp, wat gekenmerk word deur besonder klein gemeentes. Al het Queenstown dus einde 2015 net 55 belydende en ses dooplidmate gehad, was sy sieletal van 61 net drie minder as die 14 tradisioneel wit gemeentes in dié Klassis se gemiddelde sieletal van 64. Die een swart en twee bruin gemeentes in dié Klassis se gemiddelde sieletal daarenteen was toe amper 270. In 1960 was Queenstown se sieletal 247, toe hier 139 belydende en 108 dooplidmate was, vergeleke met onderskeidelik 133 en 43 in 1997.

Gereformeerde kerk Queenstown
Sluit in	Queenstown Sterkstroom Tarkastad Cathcart Seymour
Denominasie	Gereformeerde Kerk
Klassis	Burgersdorp
Huidige predikant(e)	Vakant
Belydende lidmate	46
Dooplidmate	7
Adres	H.v. Tylden- en Greenstraat Queenstown Oos-Kaap
Geskiedenis
Stigtingsdatum	1936
Eerste predikant	S.J. van der Walt (1937–1940)

Ds. C.H. Smit en die kerkraad met sy bevestiging in 1958.

Ds. A.S.L. Minnaar, die leraar van 1966 tot 1970.

Die gemeente Queenstown is op 28 Maart 1936 gestig. Aan die begin is eredienste in die saal van die NG gemeente Queenstown gehou, die sysaal van die stadsaal en die Vrymesselaarslosie in Porterstraat. Later het lidmate ook in die sitkamer van suster Greyvenstein vir eredienste bymekaargekom.

In 1948 het die gemeente aan ’n eie kerkgebou begin beplan. Die hoeksteen is op 19 Maart 1949 gelê en die gebou in Augustus daardie jaar in gebruik geneem. In 1981 is die konsistorie vergroot om te dien as saal en die vooraansig van die gebou verander volgens ’n plan wat die Gereformeerde argitek Johan de Ridder opgestel het. Die ou kloktoring, wat ’n onderstel van ’n windpomp was, is vervang deur die hoofingangshek wat ontwerp is om as kloktoring te dien.

Buiten die hoofdorp, Queenstown, sluit die gemeentegrense onder meer ook Cathcart, Seymour, Sterkstroom (waar die Gereformeerde kerk Sterkstroom ontbind het), Tarkastad, Whittlesea en die voormalige Ciskei en Transkei (waar die Gereformeerde kerk Transkei van 1955 tot 1974 bestaan het) in.

Predikante

1. Smit, Cornelius Hermanus, 1958 – 1965
2. Minnaar, Andries Stephanus Lourens, 1966 – 1970
3. Venter, dr. Andries Gerhardus Schutte, 1971 – 1973
4. Kits, Jelte, 1973 – 1976
5. Hendricks, Marthinus Petrus, 1977 – 1983 (in kombinasie met Sterkstroom
6. Van Helden, Maarten, 1984 – 1988 (in kombinasie met Sterkstroom)
7. Van der Walt, Stephen Francois Flemming, 1989 – 2005 (in kombinasie met Sterkstroom van 1989 – 2002 en in kombinasie met Dordrecht van 1998 – 2005)
8. Saaiman, dr. De Wet, 2005 – 2008 (in kombinasie met Dordrecht )
9. Van der Merwe, Willem Petrus, 2009 – einde Junie 2017 (in kombinasie met Dordrecht; aanvaar sy emeritaat)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.