Jan Fick
Jan Fick is die skrywersnaam van C.F. Albertyn (*1909, Porterville - †2 Februarie 1999, Stellenbosch) , hoofbestuurder van Nasionale Pers, uitgewer en skrywer. As Jan Fick publiseer hy verskeie fiksie verhale.
Lewe en werk wysig
Christiaan Fick Albertyn is in 1909 op Porterville gebore.[1] Hy studeer aan die Universiteit van Stellenbosch, waar hy in 1929 ’n B.A.-graad verwerf. Deur deeltydse studie behaal hy later ’n M.A.-graad in Filosofie deur die Universiteit van Suid-Afrika. In 1935 behaal hy die Ph.D.-graad aan die Universiteit van Stellenbosch met ’n proefskrif oor Jeugmisdaad: ’n sosiologiese studie, met spesiale ondersoek na die verskynsel in die Skiereiland, wat later gepubliseer word. Hy tree in 1930 in diens van die Nasionale Pers as redaksielid van Die Burger[1] en is vanaf September 1936 redakteur van Die Jongspan. In 1944 word hy direkteur van die uitgewery wat in daardie jaar gestig word. Hy word in 1947 bestuurder van die Kaapstad tak van Nasionale Pers en in hierdie hoedanigheid is hy onder andere verantwoordelik vir die stigting van die tydskrif Sarie Marais (later net Sarie). Vanaf 1954 tot 1958 is hy hoofbestuurder van Nasionale Pers en besturende direkteur van Nasionale Tydskrifte. Na aftrede stig hy die C.F. Albertyn-Uitgewery in Kaapstad op 30 November 1961, wat hom daaraan wy om naslaanmateriaal vir Afrikaanse kinders in hulle moedertaal beskikbaar te stel. Vir baie jare is hy voorsitter van die Helpmekaar-studiefonds, voorsitter van die Suid-Afrikaanse Museum en direkteur van Saambou. Daarbenewens was hy stigterslid en erepresident van die Klub Here Sewentien. In 1969 trou hy met Anna Salomina du Raan (gebore Gelderblom), wat self ’n gepubliseerde skryfster is. Uit ’n vorige huwelik het hy drie kinders, twee dogters (René en Stefanie) en ’n seun (Stoffel). Hy is op 2 Februarie 1999 op Kleinmond oorlede en sy vrou is op 5 Februarie 2005 op Stellenbosch oorlede.
Skryfwerk wysig
Onder die naam Jan Fick skryf hy fiksie. Die grenswag handel oor die tyd van die grensoorloë op die Oosgrens in die negentiende eeu.[2] Hy wy hom daaraan om naslaanmateriaal vir Afrikaanse kinders in hulle moedertaal beskikbaar te stel en is as redakteur verantwoordelik vir die publikasie van Die Afrikaanse Kinderensiklopedie, Die Ensiklopedie van die Wêreld en Kinders van die Wêreld. Verder skryf hy Die eerste eeu van die N.G. Gemeente Porterville.
Eerbewyse wysig
In 1985 ontvang hy ’n erepenning vir voortreflike wetenskaplike vakbevordering van die Suid-Afrikaanse Akademie vir Wetenskap en Kuns.[1]
Publikasies wysig
Jan Fick wysig
- 1939 Voortrekkers van Portersburg
- 1941 Die grenswag
C.F. Albertyn[3] wysig
- 1938 Jeugmisdaad: ’n sosiologiese studie, met spesiale ondersoek na die verskynsel in die Skiereiland
- 1956 Die Afrikaanse Kinderensiklopedie (redakteur)
- 1962 Kinders van die wêreld (redakteur)
- 1978 Die Ensiklopedie van die Wêreld (redakteur)
- 1979 Die eerste eeu van die N.G. Gemeente Porterville
Sien ook wysig
Verwysings wysig
Boeke wysig
- Kannemeyer, J.C. Geskiedenis van die Afrikaanse literatuur 1. Academica, Pretoria en Kaapstad Tweede druk 1984
Internet wysig
- Beeld: http://152.111.1.88/argief/berigte/beeld/1999/02/03/11/6.html[dooie skakel]
- Van Bart, Martiens Die Burger: http://152.111.1.87/argief/berigte/dieburger/2005/02/19/BY/09/02.html[dooie skakel]
- Volksblad: http://152.111.11.6/argief/berigte/volksblad/1999/02/3/3/14.html[dooie skakel]
Ander verwysings wysig
- ↑ 1,0 1,1 1,2 Remembered: http://remembered.co.za/obituary/view/14631[dooie skakel]
- ↑ Esaach: http://www.esaach.org.za/index.php?title=Fick,_Jan
- ↑ http://www.worldcat.org/identities/lccn-no94-24180/