C.F. Albertyn
Christiaan Fick Albertyn (*1909, Porterville - †2 Februarie 1999, Stellenbosch) skryf fiksie onder die naam Jan Fick. Bo en behalwe vir sy werk as uitgewer en skrywer, was Albertyn ook die hoofbestuurder van Nasionale Pers. Albertyn is ook getroud met die Afrikaanse kinder- en jeugskrywer Anna S. du Raan.[1]
Lewe en werk wysig
Christiaan Fick Albertyn is in 1909 op Porterville gebore.[2] Hy studeer aan die Universiteit van Stellenbosch, waar hy in 1929 ’n B.A.-graad verwerf. Deur deeltydse studie behaal hy later ’n M.A.-graad in Filosofie deur die Universiteit van Suid-Afrika. In 1935 behaal hy die Ph.D.-graad aan die Universiteit van Stellenbosch met ’n proefskrif oor Jeugmisdaad: ’n sosiologiese studie, met spesiale ondersoek na die verskynsel in die Skiereiland, wat later gepubliseer word. Hy tree in 1930 in diens van die Nasionale Pers as redaksielid van Die Burger[2] en is vanaf September 1936 redakteur van Die Jongspan. In 1944 word hy direkteur van die uitgewery wat in daardie jaar gestig word. Hy word in 1947 bestuurder van die Kaapstad tak van Nasionale Pers en in hierdie hoedanigheid is hy onder andere verantwoordelik vir die stigting van die tydskrif Sarie Marais (later net Sarie). Vanaf 1954 tot 1958 is hy hoofbestuurder van Nasionale Pers en besturende direkteur van Nasionale Tydskrifte. Na aftrede stig hy die C.F. Albertyn-Uitgewery in Kaapstad op 30 November 1961, wat hom daaraan wy om naslaanmateriaal vir Afrikaanse kinders in hulle moedertaal beskikbaar te stel. Vir baie jare is hy voorsitter van die Helpmekaar-studiefonds, voorsitter van die Suid-Afrikaanse Museum en direkteur van Saambou. Daarbenewens was hy stigterslid en erepresident van die Klub Here Sewentien. In 1969 trou hy met Anna Salomina du Raan (gebore Gelderblom), wat self ’n bekende skryfster is. Uit ’n vorige huwelik het hy drie kinders, twee dogters (René en Stefanie) en ’n seun (Stoffel). Hy is op 2 Februarie 1999 op Kleinmond oorlede en sy vrou is op 5 Februarie 2005 op Stellenbosch oorlede.
Skryfwerk wysig
As C.F. Albertyn publiseer, en is hy die redakteur van verskeie vakkundige publikasies. (Onder meer die Kinders van die wêreld-reeks)
Publikasies[3] wysig
- 1938 Jeugmisdaad: ’n sosiologiese studie, met spesiale ondersoek na die verskynsel in die Skiereiland·
- 1956 Afrikaanse Kinderensiklopedie
- 1962 Kinders van die wêreld (redakteur)
- 1978 Ensiklopedie van die Wêreld
- 1979 Die eerste eeu van die N.G. Gemeente Porterville
Sien ook wysig
Vir verdere biografiese inligting verwys na:
Verwysings wysig
- ↑ Remembered: http://remembered.co.za/obituary/view/14631[dooie skakel]
- ↑ 2,0 2,1 Remembered: http://remembered.co.za/obituary/view/14631[dooie skakel]
- ↑ http://www.worldcat.org/identities/lccn-no94-24180/