Opistognathidae

Die Grootbekvisse (Opistognathidae) is 'n vis-familie wat hoort tot die orde Perciformes. Daar is drie genera met ongeveer negentig spesies wat hoort tot dié familie en ten minste vier van die spesies kom aan die Suid-Afrikaanse kus voor. Daar moet nog baie navorsing oor die familie gedoen word; slegs die helfte van die spesies kan behoorlik geklassifiseer en beskryf word. Die kenmerke hieronder is van toepassing op die spesies wat in die Suid-Afrikaanse water voorkom.

Opistognathidae
Opistognathus aurifrons
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Subfilum:	Vertebrata (Cuvier, 1812)
Infrafilum:	Gnathostomata
Superklas:	Osteichthyes (Huxley, 1880)
Klas:	Actinopterygii
Subklas:	Neopterygii
Infraklas:	Teleostei
Superorde:	Acanthopterygii
Orde:	Perciformes
Familie:	Opistognathidae
Genera
Lonchopishtus Merogymnoides Opistognathus Stalix Sien teks vir spesies.

Kenmerke

Die familie Grootbekvisse het 'n kenmerkende uiters groot bek en die snoet is kort. Die lyf met die uitsondering van die kop is met klein skubbe bedek en die dorsale vin is lank. Die familie word tussen 9 – 47 cm groot en verkies sanderig en rotsagtige bodems om in te leef in water wat tot 200 m diep is. Hulle leef in gate wat hulle met hul mond maak; die mond word gebruik om klippe en sand uit te graaf. Die familie eet soöplankton en bodem ongewerweldes.

Nadat die eiers bevrug is, dra die mannetjie dit in sy mond rond tot die larwes uitgebroei het.

Genus

Die volgende genus en spesies kom aan die Suid-Afrikaanse kus voor:

• Opistognathus

• Opistognathus muscatensis - Sterkgrootbekvis
• Opistognathus margaretae - Halfskub-grootbekvis

Sien ook

• Alfabetiese lys van visse
• Lys van Suider-Afrikaanse visse volgens wetenskaplike name
• Lys van varswater visfamilies
• Lys van visfamilies

Bron

• Coastal Fishes of Southern Africa. Phil & Elaine Heemstra. 2004. ISBN 1-920033-01-7