Gereformeerde kerk Vredenburg/Saldanha
Die Gereformeerde kerk Vredenburg/Saldanha is die 12de oudste van die 21 gemeentes in die GKSA se Klassis Boland wat die hele Wes-Kaap beslaan asook die westelike uithoeke van die Noord-Kaap.
| Gereformeerde kerk Vredenburg/Saldanha | ||
| ||
| Sluit in | Vredenburg Saldanha Aurora Dwarskersbos Hopefield Jacobsbaai Koringberg Laaiplek Langebaan Moorreesburg Paternoster Piketberg Redelinghuys St. Helenabaai Velddrif Yzerfontein | |
| Klassis | Boland | |
| Huidige predikant(e) | Johan Willemse | |
| Belydende lidmate | 113 | |
| Dooplidmate | 16 | |
| Adres | H.v. Lang- en Jacob Sadiestraat Vredenburg | |
| Geskiedenis | ||
| Stigtingsdatum | 31 Julie 1976 | |
| Afgestig van | Kaapstad | |
| Eerste predikant | Wouter ten Haaf (in kombinasie) | |
Einde 2015 was hier 103 belydende en 19 dooplidmate, die vyfde kleinste gemeente in die Klassis. Benewens die dorpe Vredenburg en Saldanha, sluit die gemeentegrense ook plekke soos Aurora, Dwarskersbos, Hopefield, Jacobsbaai, Koringberg, Laaiplek, Langebaan, Moorreesburg, Paternoster, Piketberg, Redelinghuys, St. Helenabaai, Velddrif en Yzerfontein in. In dié reusegebied is 14 gemeentes van die Nederduitse Gereformeerde Kerk, maar ook net een van die Nederduitsch Hervormde Kerk, naamlik die gemeente Weskus, gestig op 18 Maart 1979, wat onder leiding van ds. Jan-Harm Barkhuizen van 122 belydende en 33 dooplidmate in 2004 tot onderskeidelik 340 en 91 in 2014 gegroei het en twee jaar later op 327 en 130 gestaan het. Van 2001 tot 2015 het die plaaslike Gereformeerde gemeente se sieletal toegeneem van 67 tot 122. 'n Jaar later was dit 113 en in 2017 het die gemeente eindelik weer 'n predikant gekry in die persoon van ds. K.P. Steyn.
Verspreidwonende lidmate van die Gereformeerde kerk Kaapstad het die Gereformeerde kerk Vredenburg/Saldanha op 31 Julie 1976 gestig, die eerste van agt gemeentes aan die Wes-Kaapse kus wat binne die daaropvolgende 30 jaar gestig sou word. Eredienste is eers by SAS Saldanha gehou en later in die saal van die Militêre Akademie. In 1981 het die 20 lidmate die ou gebou van die NG kerk op Vredenburg gekoop. Dié gebou is destyds benut as die 007 James Bond Cinema Hall en alles aan die binnekant was swart geverf. Taamlik gehawende banke is van die plaaslike munisipaliteit geleen. Dié banke is herstel en geverf. Later het ’n lidmaat, ene Koegelenberg, ander banke en ’n preekstoel gemaak.
Eendag het iemand op ’n vlooimark ’n kerkklok, wat in ’n kattebak gelê het, aan ds. Wouter ten Haaf aangebied. Hy het die gemeente van 1979 tot 1982 in kombinasie met die Gereformeerde kerk Paarl bedien. Hierdie klok is aangebring in die slawekloktoring op die kerkperseel wat byna ’n eeu lank nie ’n klok gehad het nie. Die enigste keer dat die gemeente sy eie leraar gehad het, was toe ds. Gert Botha Enslin die predikant was van 1985 tot 1988.
In Julie 2018 het ds. Karel Steyn soos volg oor sy toe net meer as ’n jaar lange bediening in die gemeente: “Ons staan werklik verstom oor hierdie kosbare gemeente! Voor ons koms was hierdie gemeente bykans 29 jaar lank vakant en het in hierdie 29 jaar staat gemaak op die hulpdiens van emeritus predikante. In die laaste paar jaar was hier tegelyk drie emeriti wat kosbare werk gedoen het: wyle dr. Jan Ras en dan dr. Izak Bekker (steeds lidmaat en diensbaar) en ds. Chris Coetzee, wat onlangs Bellville toe verhuis het.
“Met ons aankoms verlede jaar (middel Mei) was daar 97 doop- en belydende lidmate en teen 31 Maart hierdie jaar het die gemeente reeds op 127 doop- en belydend gestaan. Sedertdien het ons nog ’n aantal gesinne in die gemeente verwelkom. Die lidmate is woonagtig woon op dorpe aan die Weskus, van Yzerfontein in die suide tot by Piketberg in die noorde en Hopefield in die binneland. “Die gemeente het reeds sedert 2012 ’n organisasie sonder winsoogmerk genaamd New Hope Drug Crisis Centre, en is die laaste paar jaar van diens vir twee ander rehabilitasiesentrums in die omgewing. Ons sal binnekort ons eie fasiliteite hê en sal dan selfstandig te werk gaan. Ondertussen is ons besig om lyne op te tel met Mukhanyo Theological College om teologiese studies aan te bied vir van die persone wat deur die rehabilitasiesentrum tot bekering kom en wil deel vorm van ’n bedieningspan.
“Ons bied op 3 Augustus ons heel eerste groot fondsinsameling projek aan: ’n kaas-en-wynaand saam met die Weskus-jeugorkes en ’n plaaslike sanger, Kobus Matthews. Die susters van die gemeente het ook sterk na vore getree en het vroeër vanjaar hul eerste kombers-vou-aksie gehad. Hierdie komberse sal later vanjaar by ’n plaaslike ouetehuis uitgedeel word.
“Ons het vanjaart ook ’n heel eerste tydperk van fokus gehad in die gemeente en daar word reeds hard gewerk aan die bundel vir volgende jaar se fokustyd. Dan wil ons saam met die gemeente fokus op die Dordtse Leerreëls. Vanuit hierdie fokustyd het twee Bybelstudiegroepe ontstaan wat elke twee weke bymekaar kom - een op Saldanha en die ander op Langebaan.”
Predikante wysig
- Ten Haaf, Wouter, 1979 – 1982 (in kombinasie met Paarl)
- Hendricks, Marthinus Petrus, 1983 – 1985 (in kombinasie met Paarl)
- Enslin, Gert Botha, 1985 – 1988 (die gemeente se eerste eie leraar)
- Steyn, K.P. (Karel), 2017 – 2022
- Willemse, Mattheus Johannes (Johan), 25 Februarie 2023 – hede
Bronne wysig
- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.