I.D. Lamprecht

I.D. Lamprecht (1933–2017) was 'n Afrikaanse skrywer van jeug- en spanningsverhale. Hy het ook onder die skuilname Jan Lategan en Koot Kampher geskryf.

I.D. Lamprecht
Gebore	Izak David Lamprecht 18 Augustus 1933 Philippolis
Sterf	9 Augustus 2017 Pretoria
Beroep	Skrywer
Nasionaliteit	Suid-Afrika
Genre	Jeug- en spanningsverhale

Lewe en werk

Izak David Lamprecht is gedurende die Groot Droogte op 18 Augustus 1933 as die derde van ses kinders op Philippolis in die Vrystaat gebore. In 1951 matrikuleer hy aan die Hoërskool M.T. Steyn op sy geboortedorp.

Na skool gaan werk hy by die groot Afrikaanse handelsbank Volkskas Beperk en word onder andere rekenmeester by die bank se takke op Aliwal-Noord, Excelsior, Oos-Londen, Mafeking, Kuruman, Bellville en Springs voordat hy na hul hoofkantoor in Pretoria verplaas word.

Na verskeie groot operasies waartydens sy hele maag verwyder is, gaan hy met vervroegde aftrede en vestig hom op Mosselbaai. Later verhuis hy na Christiana (Noordwes) waar hy baie jare woon, voordat hy in 2011 na 'n aftreeoord in Pretoria verhuis.

Hy is teen die einde van 1955 getroud met Louise J. Smith, oorspronklik van Aliwal-Noord, en die egpaar het 'n dogter, Juanita Louise, en 'n seun, Heinrich Siegfriedt. Hulle het ook 'n kleindogter, (Juanita) en 'n agterkleinseun (Damian).

Lamprecht is op 9 Augustus 2017 in Pretoria oorlede.

Skryfwerk

Sy eerste ernstige poging tot skryfwerk is op skool met die beskrywing van 'n ware gebeurtenis. Hy en sy broer moes as jong seuns op 'n onweersnag sukkel om 'n koei met haar pasgebore kalfie by die huis te kry. Hierdie opstel word aan die klas voorgelees, maar smalend afgemaak as handelende oor “koeitjies en kalfies”. Na sy vrou 'n ernstige hartkwaal ontwikkel en hulle buite-aktiwiteite as gevolg daarvan tot 'n einde kom, wend hy sy aandag aan skryfwerk om die tyd te verwyl. Hy begin met spanningsverhale, waarvan die eerste een in 1972 gepubliseer is, maar skryf later ook liefdesverhale en selfs jeugverhale. Verskeie vervolgverhale en kortverhale word in tydskrifte gepubliseer.

Jeugverhale

Sy jeugverhale sluit in Ghoen keer terug, Die koperperd, Die blinde horlosie en Oom Johnny.

In Oom Johnny moet Barney van der Spuy gou geld in die hande kry. Nie sy nuuskierigheid oor die vreemde gedoentes by die spookhuis langsaan, of muisneste, of die gedurige veglustigheid van Spiere en sy makkers durf sy planne in die wiele durf ry nie. Oom Johnny hou die sleutel tot ’n oplossing.

Sending Kosmos is ’n ruimtefantasieverhaal wat ook op die jeugmark gerig is.

Spanningsverhale

Hy is egter veral bekend vir sy aksieverhale, veral die Dokter Skip Wessels en Hugo Storm boekreekse.

Hugo Storm-reeks

Hugo Storm is ’n private speurder. In Die vierkantige driehoek (1973) moet Hugo ’n misdaadbende binnesypel en dan die hele bende van kant maak – teen betaling natuurlik. Dis natuurlik nie so maklik om dit te doen nie en nadat hulle bewus word van sy motiewe is hy sy lewe nie meer seker nie. Daar’s ’n gat in die grond (1986) sê die ou tannie vir Hugo. Sy bedoel prospekteergate, maar hy besef gou dat iemand hom in ’n ander gat in die grond wil hê, want daar is verskeie onverklaarbare aanslae op sy lewe. Dit het iets te doen met die groot gat wat Bill Raymond op tant Em se plaas grawe, maar dit is al wat hy weet. In Kat aan die stert probeer Hugo uitvind watter verband die skatryk magnaat Jan du Preez, wat betrokke is by sake van staatbelang, met die berugte Smoothy Johnson en John Edwell het. In Die Judaskus vra twee mooi nooiens vir Hugo om ’n saak te ondersoek. Een wil hê hy moet haar broer se onskuld aan dwelmhandel bewys, die ander versoek hom om haar broer se skuld te bewys. Albei die meisies het boonop dieselfde naam en Hugo is smoorverlief op albei. Hugo aanvaar die uitdaging wat die saak bied en bevind hom byna onmiddellik in die pekel. Hy word deur vreemde mans as slaansak gebruik, die polisie wantrou hom en albei meisies gee voor dat hulle op hom verlief is. Een van hulle se soen is egter ’n Judaskus.

Klub 707-reeks

Sy boeke Ook terwyl ek lag, Die kleiskyf, Die derde kant van die sirkel, Vlug van die feniks, Die bangoed van Agan, Die Judaskus, Operasie skaakmat, Dank jou die duiwel en Blindemol is almal deel van die Klub 707-reeks.

Liefdesverhale

In die geur van narsings en Sing weer jou lied vir my (1984) is liefdesverhale. In Sing weer jou lied vir my  sterf Vienna Krogh se ouers in ’n ongeluk en sy erf skatryk, maar hoor die ontnugterende nuus dat sy ’n aangenome kind was. Sy besluit om na haar eie ma te gaan soek en versoek vir Karel Schoeman om haar te help. Karel het haar lief, maar sy behandel hom soos ’n ouer broer. Deur Karel ontmoet sy die losbol Mike Byleveldt, wat besluit om haar te verower. Om dit te doen, moet hy hom soos ’n heer gedra en sy ouers, met al hulle geraamtes in die kas, in bedwang hou. Die verlore ma word opgespoor en dit lei na ’n spannende einde.

Skuilname

Hy skryf ook onder die skuilname Jan Lategan en Koot Kampher. Die swart engel en ’n Knak in die kring is boeke in die Skip Wessels reeks wat hy onder die skuilnaam Jan Lategan skryf. Die rus is elders verskyn ook onder die naam Jan Lategan. Hierin verlaat die ambisieuse Anna Bornman die dorpie Stofdraai om in Johannesburg haar fortuin as model te gaan soek, maar sy loop sommer dadelik in die moeilikheid in. Sy kry losies in ’n jeugherberg, maar vind gou uit dat dit meer van ’n bordeel is. Wanneer die polisie ’n klopjag uitvoer, probeer sy wegsluip, maar die polisie sien haar. Die onbekende George Bosman verklaar egter aan die polisie dat hulle met mekaar uitgaan en hy neem haar na tant Bets se huis vir herberg, help haar om werk te kry as model, tree op as haar bestuurder en sorg dat sy ’n baie goeie salaris kry. Dan vind sy uit dat iemand sonder haar medewete naakfoto’s van haar geneem het en sy word afgepers.

Publikasies

Werke uit sy pen sluit in:

Publikasies	Jaar	ISBN
I.D. Lamprecht
Val van die muntstuk	1972	0628002343
Derde kant van die sirkel (Hugo Storm-reeks)	1973	0628002793
Die skaal in my hand	1973	0628004494
Vierkantige driehoek (Hugo Storm-reeks)	1973	0628003935
Kleiskyf (Hugo Storm-reeks)	1974	0628005695
Waar die meetsnoer val	1974	0628004745
Huurling	1975	0869690418
Nabod se wingerd	1975	0869690531
Plaasvervangers (Hugo Storm-reeks)	1975
Die blinde horlosie	1976	0798602694
Ver blink die reënboog	1976	0799302260
Vlug van die feniks (Dr. Skip Wessels-reeks)	1976
Wat my toebedeel is	1976	0869690644
Duiwelsboom	1977	0628011830
Pion op die blokkiesbord (Dr Skip Wessels-reeks)	1977	0628011350
Voor die winter kom	1977	086969068X
Brug oor die kloof	1978	0868080055
Liefde se skyn	1978	0869690787
Merk van die vlamlelie (Dr Skip Wessels-reeks)	1978
Steekbaard	1978
Volg die somerson	1978
Aasvoëls van die betonwoud	1979	0909067643
Operasie vyfster (Hugo Storm-reeks)	1979	0868080152
Pad enduit	1979	0909067880
Speurders van waterval	1979	0798604441
Sterrebakens	1979	0909067422
Bangoed van Agan (Dr Skip Wessels-reeks)	1980	0628017324
Dom speurder	1980	0868142018
Kat aan die stert	1980	0798110325
Nardusfles	1980	0868140430
Ruwestrand	1980	0868142174
Seeman van die Albatros	1980	0868142433
Sending Kosmos	1980
Silwer van die maan	1980	0868141291
Sondebok	1980	0868030306
Tonnelrowers	1980	0868140473
Vosperd van die Kalahari	1980	0868141410
Môre sonder wolke	1981	086969121X
Oor vyftien rondtes	1981	06282195X
Speurders van waterval	1981	0798607858
Spookhuis van Stormberg	1981	0868142824
Swiep van die Kalahari	1981	086814374X
Tyd van die volmaan	1981	0868144312
Verminker (Dr Skip Wessels-reeks)	1981	0628020678
Anderkant die verste ster	1982	0628023103
Baron vir Stella	1982	0868145858
Dank jou die duiwel (Dr Skip Wessels-reeks)	1982	0628022867
In die geur van narsings	1982	0869691392
Spervalk	1982	0628023235
Ek is ’n kat en my naam is Meneer	1983
Glans van die silwer maan	1983
Luistervink	1983	062900174
Meneer die kat en die bure se brak	1983
Meneer die kat lag die laaste	1983
Somersfontein	1983	0629001766
Wedloop	1983	0798610077
Glans van die silwermaan	1984	0869691643
Heksepot	1984	0628027257
Judaskeuse	1984	0628027354
Judaskus (Hugo Storm-reeks)	1984	0628028539
Ook terwyl ek lag	1984	0628024487
Pluk vir jou 'n blom	1984	0868148679
Sing weer jou lied vir my	1984	0628026420
Steekbaard	1984	0798615087
Vuurvoël	1984
Ghoen keer terug	1985
Gyselaars	1985
Operasie skaakmat	1985	0628029772
Daar’s ’n gat in die grond (Hugo Storm-reeks)	1986
Oom Johnny	1986
Rooi oog van Satan	1986	0628031147
Blindemol	1987	0628032080
Geheim van die neusberg	1987	0628031785
Megawatt-eksperiment	1987
Uitoorlê	1988	0628033044
Ghoen keer terug	1989	0868160644
Glybaan (Hugo Storm-reeks)	1989	0628033966
Henk verdien sy vlerke	1989	0628033907
Oom Johnny	1989	0798629185
Rampie se ark	1989
Sleurstroom	1989
Sonder 'n spoor (Hugo Storm-reeks)	1991	0628034628
Koperperd	1993	0798633794
Baron vir Stella (Grootdruk)	1994	0868145547
Huurling (Grootdruk)	1995	0868127248
Knak in die kring (Grootdruk) (Dr Skip Wessels-reeks)	1996	0868128171
Nabot se wingerd (Grootdruk)	1996	0868128244
Pion op die blokkiesbord (Grootdruk) (Dr Skip Wessels-reeks)	1996	0868129364
Pluk vir jou 'n blom (Grootdruk)	1996	0868128198
Verminker (Grootdruk) (Dr Skip Wessels-reeks)	1996	0868129372
Voor die winter kom (Grootdruk)	1996	0868128236
Operasie Vyfster (Grootdruk) (Hugo Storm-reeks)	1997	1868920542
Sing weer jou lied vir my (Grootdruk)	1997	1868920240
'n Hand vol note	2009	1920036946
Skip aan die kaai	2009	9781920376130
Slang in die gras	2009	1920036962
Koot Kampher
Skaal in my hand	1973	0628004494
Lategan, Jan
Swaai van die boemerang	1973
Rus is elders	1974	0628005830
Swart Engel, Die (Dr Skip Wessels-reeks)	1974	062800656
Knak in die kring (Dr Skip Wessels-reeks)	1975	0628007582
Swart Baron, Die	1976	0869690639
Drie plus drie	1979	868080144
Plaasvervangers (Hugo Storm-reeks)	1996	0868129615

Bronnelys

Tydskrifte en koerante

• Anoniem. Van rekenmeester tot trefferboek-skrywer. Die Transvaler, 9 Februarie 1984