Mosie Suzman

Dr. Moses Meyer (Mosie) Suzman (Johannesburg, 6 Maart 1904 – Johannesburg, 11 Julie 1994) was ’n Suid-Afrikaanse mediese spesialis. Hy het nog tot in sy tagtigerjare in sy tuisstad gepraktiseer. Buiten sy eie uitnemende loopbaan, was hy ook bekend as die eggenoot van seker Suid-Afrikaanse se beroemdste Volksraadslid, Helen Suzman, wat die kiesafdeling Houghton van 1958 tot 1989 vir vier verskillende partye verteenwoordig het nadat hy haar in 1957 gevra het om haar beskikbaar te stel vir benoeming. Wanneer die parlement in sitting was, het mev. Suzman al om die ander naweek opgevlieg Johannesburg toe om twee dae saam met hom deur te bring.

Helen Gavronsky tree op 12 Augustus 1937 in die Groot Sinagoge in Wolmaransstraat, Johannesburg, in die huwelik met dr. Mosie Suzman.

Herkoms en opleiding

Suzman is in 1904 in die Goudstad gebore, wat toe nog nie eens twee dekades oud was nie nadat goud in 1886 daar ontdek is. Sy vader was ’n welgestelde tabakgroothandelaar wat in die 1880’s uit Litaue na Transvaal geëmigreer het. Suzman, een van agt kinders, het eers aan die Universiteit van die Witwatersrand studeer, en toe sy studie voortgesit aan die Universiteit van Durham, die Massachusetts Algemene Hospitaal en die Thorndike-gedenklaboratorium in Boston in die VSA. Tydens die Tweede Wêreldoorlog, toe miljoene van Jode in Nazi-konsentrasiekampe omgekom het, het hy hom aangesluit by die Suid-Afrikaanse mediese korps en diens gedoen in Egipte, waar hy in bevel was van die 106 Mediese Eenheid van die Suid-Afrikaanse Algemene Hospitaal.

Gesinslewe

Dr. Suzman se beroemde vrou, Helen Suzman.

Voor die Tweede Wêreldoorlog het Suzman op ’n dag perd gery by ’n perdyskool aan die Rand toe hy in die ry langs ’n meisie, Helen Gavronsky, ook van Litause afkoms, beland. Hy was 14 jaar ouer as sy. Dié twee het mekaar reeds geken, maar toe het hul vriendskap geblom en in 1937 is hulle in die Groot Sinagoge in Wolmaransstraat, Johannesburg, getroud.

Die egpaar Suzman het twee dogters gehad. Die jongste, Patricia, ’n nefroloog, het in later jare in Boston in die VSA gewoon en gewerk. Frances, die oudste, was ’n kunshistorikus wat met ’n professor in die regte, Jeffrey Jowell, getrou het en in Londen gaan woon het. Dié egpaar het albei aan Harvard afstudeer. Hul eersteling, Joanna, is in Massachusetts gebore en die twee, Daniel, in Kanada, waar die gesin ’n tyd lank gewoon het.

Loopbaan

Dr. Suzman het meer as 25 jaar lank ’n privaat mediese praktyk bedryf tot sy formele aftrede in die ouderdom van 65. Daarna het hy nog naarstig oor sy vakgebiede nagelees en heelwat daaroor geskryf. ’n Konstante stroom gesaghebbende geskrifte oor ’n wye verskeidenheid mediese onderwerpe het uit sy pen verskyn. In vele opsigte was hy sy tyd vooruit en was hy altyd ’n vindingryke denker. Hy het die gebruik van betablokkeerders ontwikkel vir die behandeling van angs en hiperventilasie lank voor dié praktyk algemeen aanvaar is.

Dr. Suzman het wêreldwye erkenning gekry vir sy mediese navorsing en kliniese praktyk en ’n Rockefeller-stigtingsgenootskap aan Harvard. Hy was ’n genoot van die Royal College of Physicians in Londen, ’n eregenoot van dié instelling se Amerikaanse eweknie en ’n genoot van die American College of Cardiologists. Die Universiteit van die Witwatersrand het ’n eredoktorsgraad aan hom toegeken, soos trouens ook aan sy vrou. Aan dié universiteit het hy dekades lank kreatief klas gegee en geslagte Wits- mediese studente begeester met sy warm menslikheid. Hy was ’n dokter wat internasionale aansien geniet het danksy sy skerp en rustelose verstand wat gedurig bestaande opvattings bevraagteken het. Hy het ’n baanbrekersgees gebring na uiteenlopende vakgebiede soos hematologie, kardiologie en psigiatrie. Ná sy dood het sy vrou gesê: “Waar ek ook al in die buiteland gereis het, sou die een of ander dokter na my kom en sê: ‘Ek het alles wat ek van medisyne weet by Mosie geleer in Saal 11 van die Johannesburgse Algemene Hospitaal.’” Sy pasiënte het sy deernis en aandag aan besonderhede waardeer. Nooit sou hy ’n kitsoplossing bied nie, maar altyd moeite doen om tot sy eie gevolgtrekking te kom.

Privaat lewe

Dr. Suzman het ’n lewendige belangstelling in die kunste en musiek, goeie kos, wyn en sport getoon en was gek oor Persiese tapyte. Hy het na kennis gesmag en graag sy eie ontdekkings gedoen. Ondanks sy bedrywige program het hy getrou elke jaar die vergaderings bygewoon wat sy vrou in haar kiesafdeling gehou het om verslag te doen oor haar werksaamhede van die afgelope jaar. Hy het haar toewyding aan ’n regverdiger bedeling in Suid-Afrika gedeel.

Bronne

• (en) Sy doodsberig in die Independent. URL besoek op 19 Oktober 2015.