Perskopkurper

Die perskopkurper (Serranochromis macrocephalus) is 'n varswatervis wat in die Okavangorivier, Kunenerivier, boonste gedeelte van die Zambezirivier, die Kafuerivier en Karibadam voorkom. Die vis kom ook voor in sytakke van die Kongorivier. In Engels staan die vis bekend as die Purpleface largemouth.

Perskopkurper
Bewaringstatus
Veilig  (IUCN 3.1)
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Subfilum:	Vertebrata (Cuvier, 1812)
Infrafilum:	Gnathostomata
Superklas:	Osteichthyes (Huxley, 1880)
Klas:	Actinopterygii
Subklas:	Neopterygii
Infraklas:	Teleostei
Superorde:	Acanthopterygii
Orde:	Perciformes
Familie:	Cichlidae
Subfamilie:	Pseudocrenilabrinae
Genus:	Serranochromis (Regan, 1920)
Spesie:	S. macrocephalus
Binomiale naam
Serranochromis macrocephalus (Boulenger, 1899)

Voorkoms

Die wyfie is olyfbruin of geel met gryserige swart strepe oor die lyf en stertvin. Die mannetjie het 'n rooierige dorsale-, stert- en analevinne. Broeiende mannetjies word donkerolyf met 'n donkerpers skynsel oor die sye en aan die bokant van die kop. Die kolletjies op die analevin word dan romerig pienk. Die vis word tot 35 cm lank en weeg dan ongeveer 1.5 kg. Die Suid-Afrikaanse hengelrekord is 2,13 kg en die Zimbabwe-hengelrekord is 0,536 kg.

Habitat

Die vis leef in 'n verskeidenheid habitatte; van die hoofstroom van riviere, vloedvlaktes en mere. Hulle vreet insekte en klein vissies onder andere bottelneuse en ghieliemientjies - wat hulle op die bodem vang. Die visse broei in die lente en vroeë somer net voor die jaarlikse vloed kom. Die wyfie lê betreklik min maar groot eiers en is 'n mondbroeier.

Sien ook

• Alfabetiese lys van visse
• Kurper
• Lys van Suider-Afrikaanse visse volgens wetenskaplike name
• Lys van varswater visfamilies
• Lys van visfamilies

Bron

• A Complete Guide to the FRESHWATER FISHES of Southern Africa. Paul Skelton. 2001. ISBN 978-1-86872-643-1

Eksterne skakel

• Serranochromis macrocephalus by FishBase