Simonstad (kiesafdeling)

Simonstad het Suid-Skiereiland in 1958 opgevolg as die kiesafdeling in die mees suidelike deel van die Kaapse Skiereiland.

Die LV vir Suid-Skiereiland, Lewis Charles Gay, van die Verenigde Party, wat in 1953 daar onbestrede verkies is, kry ook in 1958 in Simonstad geen teenstand nie. Simonstad stem dan ook in die volkstemming van 1960 oorweldigend teen republiekwording met 9 229 nee-stemme en 2 591 ja-stemme. Gay kry in 1961 se algemene verkiesing 4 632 stemme meer as die nuwe Progressiewe Party se J. Beck. Gay bly tot 29 Maart 1966 LV vir Simonstad en word opgevolg deur John Wiley wat die setel vir die Verenigde Party behou met 2 268 stemme meer as die Nasionale Party se L.A. Pienaar, LV vir Bellville vanaf die tussenverkiesing op 28 Oktober 1970.

Wiley behou Simonstad in 1970, eweneens teen Pienaar, met 'n vergrote meerderheid van 3 796 stemme en in 1974 teen die N.P. se W.C. Dempsey met 'n meerderheid van 3 295. In die aanloop tot die ontbinding van die V.P. in 1977 om 'n breër opposisieparty te stig, word ses Volksraadslede op 19 Januarie 1977 uit die party geskors omdat hulle hul nie met sir De Villiers Graaff se inisiatief ("Red Suid-Afrika") kon vereenselwig nie. Wiley was een van hulle.

Die ses stig op 26 Maart 1977 die Onafhanklike Verenigde Party, waarvan die naam op 28 Mei 1977 na die Suid-Afrikaanse Party (die derde party met dié naam sedert 1910) verander word. Die party vaar verbasend goed in die verkiesing net ses maande na sy stigting. Wiley behou Simonstad en S.A.P.-kandidate wen ook twee setels in Port Elizabeth – Sentraal en Walmer. Die eerste leier was Myburgh Streicher van Mei 1977 tot Januarie 1978 en die tweede en laaste Wiley van 21 Januarie 1980 tot en met die party se inlywing by die Nasionale Party onder leiding van P.W. Botha op 13 Junie 1980.

Sien ook

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Liesbeek, Maitland,Mowbray, Nuweland, Parow, Pinelands, Rondebosch, Seepunt, Soutrivier, Suid-Skiereiland, Tygervallei, Vasco, Woodstock, Wynberg

Bronne

• Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.