Marga van Rooy
Marga van Rooy (* 1942 – † 2017)[1] was 'n Afrikaanse aktrise, veral bekend vir haar rol as Ella in Vetkoekpaleis, asook TV-sepies soos Egoli, Molly en Wors en Villa Rosa. Sy het ook talle eenvrou-vertonings oor die land opgevoer. Van haar rolprente sluit in Verkeerde nommer, Die Windpomp en Vrou Soek Boer. Sy is ook die skrywer van die boek In die skadu van skisofrenie (2016), saam met haar oudste dogter Henriëtte Boot.[2]
| Marga van Rooy | |
| Geboortenaam | Marga Henriette van Rooy |
|---|---|
| Geboorte | 25 Januarie 1942 Burgersdorp, Kaapprovinsie |
| Sterfte | 15 Januarie 2017 (op 74) Pretoria |
| Nasionaliteit | Suid-Afrika |
| Beroep(e) | Aktrise |
| Aktiewe jare | 1960–2016 |
| Rolprente | Verkeerde nommer, Die Windpomp, Vrou Soek Boer |
| Internet-rolprentdatabasis-profiel | |
Lewensloop
wysigMarga Henriette van Rooy is op 25 Januarie 1942 op 'n plaas naby Burgersdorp in die Oos-Kaap gebore. Haar ma, wat algemeen as tannie Jetjie bekendgestaan het, en pa, Maurits, het drie kinders gehad: Marga, Joon en Mietie. Jetjie van Rooy was hoof van die plaasskool op Matjiesvlei, hul plaas. Dis op die Kommedantskoppad in die distrik Albert. Marga se pa was die sewende kind van Izak van Rooy, die sesde kind van die Van Rooy-stamouers, Johannes Cornelis van Rooy en Anne Holsters.
In 1965 word die eerste Jamie Uys-dramabeurs aan haar toegeken, waarna sy haar BA-graad in Drama en haar honneursgraad (cum laude) aan die Universiteit van Pretoria verwerf. In 1963 is sy as die beste aktrise by die ASB-dramafees vir studente aangewys.[3]
In 1964 word sy by die destydse Transvaalse Raad vir die Uitvoerende Kunste (Truk) aangestel. Sy vertolk uiteenlopende rolle, van Shakespeare tot Melt Brink, Tsjechof tot Sophokles en het talle nominasies en toekennings vir haar spel ontvang.
Tydens haar tyd by Sukovs van 1994 tot 1995 verower sy die nasionale FNB Vita-prys vir haar debuutopvoering, Die Pakkamer, as Beste Dramaturg. Sy ontvang ook ’n VITA-prys as Beste Byspeler in Pieter Fourie se drama Die groot wit roos.[4]
Sy word later landswyd bekend vir haar uitbeelding van Worsie se ma in die TV-reeks Vetkoekpaleis. Sy was ook in reekse soos Egoli, 7de Laan en in Villa Rosa op kykNET te sien. In 2014 verower sy die titel van Beste Byspeler vir die fliek Die Windpomp. Sy is ook vir 'n SAFTA vir haar rol in Fanie Fourie se Lobola benoem.
Ná jare se optredes in eenvrou-vertonings by feeste, bv. met werke van Dot Serfontein, P.H. Nortje en Mikro, word sy in 2015 as Beste Byspeler vir haar rol in Beauty Queen (Martin McDonagh o.l.v. Henry Mylne) genomineer.
Sy is op 15 Januarie 2017, op 74-jarige ouderdom, aan kanker oorlede. Van Rooy was met Frans Boot getroud. Die egpaar het vyf kinders gehad.
Filmografie
wysig- ’n Pawpaw vir my darling, 2015 as Girla
- Hollywood in my Huis, 2014 as tannie Lenie
- Die Windpomp, 2014 as Tannie
- Vrou Soek Boer, 2014 as Tannie Bettie
- Molly & Wors, 2013 as Ella Visagie
- Fanie Fourie's Lobola, 2013 as Louise Fourie
- Karate Kallie, 2009 as Ma
- Panic Mechanic, 1996 as mev. Van der Merwe
- Onder Engele (TV-reeks), 1995 as Bell
- Lipstiek Dipstiek, 1994 as mev. Steyn
- ’n Pot Vol Winter, 1992 as Engelse tannie by Loket
- Egoli: Plek van Goud (TV-reeks), 1991 as Tossie du Bossion (2003-)
- Torn Allegiance, 1986 as Boerervrou
- Die groen faktor, 1984 as Susan Vermaak
- Verkeerde nommer, 1982 as matrone
- Die Perdesmous (TV-fliek), 1981
- Eendag op ’n reëndag, 1975 as Nellie
- Babbelkous, 1974 as Susan van den Bergh
- Pappa Lap: 'n Verhaal van 'n pa en sy dogter, 1971 as Maggie Kleynhans
Verwysings
wysig- ↑ Die familie Van Rooy in Suid-Afrika
- ↑ Marga van Rooy oorlede, Maroela Media, 15 Januarie 2017
- ↑ Profiel op ESAT, besoek op 15 Januarie 2017
- ↑ Marga van Rooy – Vrou uit een stuk Geargiveer 15 Januarie 2017 op Wayback Machine, afrikaans.com, besoek op 15 Januarie 2017