Pieter Mulder
Dr. Pieter W.A. Mulder (* 26 Julie 1951, Randfontein– ) is ’n voormalige leier van die Vryheidsfront Plus en ’n voormalige Adjunkminister van Landbou, Bosbou en Visserye.
| Pieter Mulder | |
 Dr. Mulder in 2013 | |
Adjunkminister van Landbou, Bosbou en Visserye
| |
| Ampstermyn 10 Mei 2009 – 25 Mei 2014 | |
| President | Jacob Zuma |
|---|---|
| Minister | Tina Joemat-Pettersson |
| Voorafgegaan deur | Dirk du Toit |
| Opgevolg deur | Bheki Cele |
Leier van die Vryheidsfront Plus
| |
| Ampstermyn April 2001 – November 2016 | |
| Vise | Abrie Oosthuizen |
| Voorafgegaan deur | Genl. Constand Viljoen |
| Opgevolg deur | Pieter Groenewald |
Persoonlike besonderhede
| |
| Gebore | 26 Julie 1951 Randfontein, Suid-Afrika |
| Politieke party | KP (1982–1994) VF+ (1994 - ) |
| Eggenoot/-note | Triena Mulder |
| Kind(ers) | Heleen Suzanne Catrien Connie Gerdi |
| Alma mater | Potchefstroomse Universiteit vir CHO |
| Religie | Gereformeerd |
Grootwordjare en studies
wysigMulder is op 26 Julie 1951 gebore en het in Randfontein en Kaapstad grootgeword. Hy voltooi sy hoërskoolopleiding in 1968 aan die Riebeeck Hoërskool in Randfontein, waar hy onder andere die hoofseun en Victor Ludorum in atletiek was.
In 1969 verrig hy sy militêre diensplig in die Suid-Afrikaanse Vloot te Saldanhabaai, en aan die einde van die jaar is die eresabel aan hom toegeken as die beste offisier van die jaar.
Mulder voltooi sy BA-graad in Kommunikasiekunde in 1974, en ook sy MA-graad in Kommunikasiekunde in 1976, aan die Potchefstroomse Universiteit vir CHO met onderskeiding. As student was hy onder andere Voorsitter van die Alabama-studentegeselskap; het hy vir die universiteit se o/20-rugbyspan gespeel en was hy ook Voorsitter van die Studenteraad. In 1978, op 26-jarige ouderdom, verwerf hy die doktorsgraad in Kommunikasiekunde.
Gedurende 1981 studeer hy vir ’n jaar lank aan die Universiteit van Wisconsin, Madison, in die Verenigde State van Amerika. Sy na-doktorale studie daar het oor internasionale kommunikasie gehandel.
Mulder is in 1974 as dosent in Kommunikasiekunde aan die PU vir CHO aangestel en word in dieselfde jaar gekies tot vise-president van die Suider-Afrikaanse Kommunikasiekundedosentevereniging. Hy word ook in 1984 lid van die Openbare Skakelinstituut. Hy is daarna in 1985 tot professor en departementshoof van die Departement Kommunikasiekunde bevorder.
Politieke loopbaan
wysigMulder se openbare politieke loopbaan begin in 1985 met sy verkiesing as stadsraadslid in Potchefstroom. Hy is verder in 1988 in ’n tussenverkiesing tot Parlementslid verkies – hy was die Konserwatiewe Party se verteenwoordiger vir die kiesafdeling Schweizer-Reneke – en hy was ook deel van die KP se onderhandelingspan met die ANC in 1993 voor die 1994-verkiesing. In op 4 Desember 1993 vereer Bloemhof hom met ereburgerskap “vanweë [sy] uitnemende volksleidinggewende onbaatsugtige diens op verskeie vlakke.”
In Maart 1994 is hy betrokke by die stigting van die Vryheidsfront waar hy tot voorsitter verkies is, en is sedert 1994 ’n VF-Parlementslid. Mulder is egter in April 2001 tot die leier van die Vryheidsfront verkies, en dien as die VF se hoofwoordvoerder oor Buitelandse Sake en die Uitsaaiwese.
Hy was ook ’n lid van die VF se onderhandelingspan in die Grondwetskrywende Vergadering en het gedurende 1994 en 1997 deel gevorm van ’n veelpartygroep wat namens die Suid-Afrikaanse Parlement verskillende lande besoek het ten einde hulle verskeie grondwette te bestudeer.
Die Organisasie vir Onverteenwoordigde Volke en Mense (Unrepresented Nations and Peoples Organization – UNPO) het op hul IXde Algemene Vergadering op 16 en 17 Mei 2008 in Brussel, België, die Afrikaners eenparig aanvaar as lid van die organisasie. Mulder het die lidmaatskap van UNPO namens die Afrikaners aanvaar.
Op 10 Mei 2009 word hy deur pres. Jacob Zuma aangestel as Adjunkminister van Landbou, Bosbou en Visserye onder Tina Joemat-Petterson.[1][2][3] Hy behou sy pos as leier van die Vryheidsfront Plus maar bedank as parlementêre leier van die party.
Teen einde Mei 2010 het Mulder daarin geslaag om ’n mosie oor die ernstigheid van plaasmoorde in Suid-Afrika aanvaar te kry voor UNPO se sitting in Rome, Italië. Hy is tydens hierdie geleentheid ook gekies om op die organisasie se dagbestuur te dien.[4]
In Februarie 2012 was Mulder weer in die nuus nadat hy in die parlement, in reaksie op pres. Zuma se staatsrede, gesê het dat die swart bevolking geen historiese aanspraak het op die Wes- en Noord-Kaap nie omdat daar niemand behalwe die Khoi- en San-mense was nie toe Jan van Riebeeck in 1652 aan die Kaap geland het. Die swart bevolkingsgroepe het van die noorde van Afrika suid getrek en het die blankes eers by die Keirivier teëgekom.[5] Prof. Hermann Giliomee, gesiene Suid-Afrikaanse historikus, asook die voormalige media-ombudsman in Suid-Afrika, James Myburgh, het egter vir Mulder in die bres getree en die media daarvan beskuldig dat hulle spoke opjaag en die punt van Mulder se toespraak oor die manier waarop grondherverdeling plaasvind, totaal ignoreer en buite konteks aanhaal.[6][7][8] Frans Cronjé, hoof van die Suid-Afrikaanse Instituut vir Rasseaangeleenthede het ook tot die gesprek toegetree en Mulder verdedig deur te sê dat blankes slegs 50% van die grond in Suid-Afrika besit terwyl die regering se syfers meen dit is 87%.[9]
Op 25 Mei 2014 is aangekondig dat Bheki Cele vir Mulder as adjunkminister vervang.[10] Mulder is nie weer ’n pos op ’n soortgelyke vlak aangebied nie.
Onder Mulder se leierskap het ondersteuning van die Vryheidsfront Plus in al nege provinsies van Suid-Afrika toegeneem.[11] In die Wes-Kaap het ondersteuning vervierdubbel en in die Noord-Kaap het dit vyfvuldig toegeneem.[12]
Mulder het in November 2016 as leier van die VF+ uitgetree, waarna dr. Pieter Groenewald as sy opvolger aangewys is.[13]
Persoonlike lewe
wysig
Mulder het verskeie kere as kerkraadslid in sy gemeente, die Gereformeerde kerk Randfontein, gedien en is deurlopend aktief betrokke in Afrikaner-kultuurorganisasies en -aktiwiteite. Hy speel muurbal, lees graag en stel in sterrekunde, rekenaars en geskiedenis belang.
Pieter Mulder is met Triena Roestorf getroud, hulle het vyf kinders en is in Potchefstroom woonagtig.
Triena was ’n wiskunde-onderwyseres en het haar B.Sc Honns in Wiskunde aan die PU vir CHO voltooi. Sy was departementshoof: wiskunde aan die Hoër Tegniese Skool Potchefstroom asook aan die Hoërskool Schweizer-Reneke. Sy gee tans onderrig in wiskunde aan die Potchefstroom Gimnasium.
Dr. Mulder het vroeg in 2009 ’n boek oor sy ervarings in die Suid-Afrikaanse politiek die lig laat sien met die titel "Kan Afrikaners Toyi-toyi?"[14]
Nalatenskap
wysig- In 2018 is die Vryheidsfront Plus se hoofkantoor in Centurion na Mulder vernoem as erkenning vir sy bydrae tot die party.[15]
Verwysings
wysig- ↑ Naudé, Colleen (22 Mei 2009). "'n Mulderhek gaan oop" (html). Fin24. Geargiveer vanaf die oorspronklike op 2 Oktober 2018. Besoek op 22 Februarie 2012.
- ↑ Du Toit, Pieter (12 Mei 2009). Alle VF-leiers steun Mulder (html). Beeld. URL besoek op 22 Februarie 2012.
- ↑ Isaacs, Abigail (24 Mei 2009). Mulder kry groen lig vir kabinet (html). Beeld. URL besoek op 22 Februarie 2012.
- ↑ Mulder, Pieter (31 Mei 2010). UNPO-kongres 2012 (html). VF+. URL besoek op 22 Februarie 2010.
- ↑ Azzakani, Rajaa (16 Februarie 2012). Mulder vat Zuma aan oor grond (html). Die Burger. URL besoek op 22 Februarie 2012.
- ↑ Giliomee, Hermann (23 Februarie 2012). "Wat Mulder eintlik sê" (html). Beeld. Geargiveer vanaf die oorspronklike op 1 Maart 2012. Besoek op 27 Februarie 2012.
- ↑ (en) Myburgh, James (22 Februarie 2012). Mulder, Zuma and the press (html). PoliticsWeb.co.za. URL besoek op 27 Februarie 2012.
- ↑ Milazi, Abdul (22 Februarie 2012). "Is Mulder racist, or are we?" (html). TimesLive.co.za (in Engels). Geargiveer vanaf die oorspronklike op 2 Oktober 2018. Besoek op 27 Februarie 2012.
- ↑ Cronjé, Frans (25 Februarie 2012). "Grond: net hitte, geen lig". Rapport. Geargiveer vanaf die oorspronklike (html) op 29 Februarie 2012. Besoek op 29 Februarie 2012.
- ↑ "Volledige lys van Jacob Zuma se 2014 Kabinet – ministers en adjunkte". BizNews.com (in Engels). 25 Mei 2014. Geargiveer vanaf die oorspronklike op 22 Oktober 2014. Besoek op 27 Mei 2014.
- ↑ "Vryheidsfront Plus groei landswyd" (Nuusberig). Vaal Weekblad. Geargiveer vanaf die oorspronklike op 2 Oktober 2018. Besoek op 29 Junie 2017.
- ↑ "Vryheidsfront Plus groei landswyd" (Nuusberig). Parys Gazette. Geargiveer vanaf die oorspronklike op 2 Oktober 2018. Besoek op 29 Junie 2017.
- ↑ VF+ het nuwe leier, Die Vryburger, besoek op 14 November 2016
- ↑ De Beer, Linda (2 Februarie 2009). Mulder illustreer SA politiek só in ‘toyi-toyi’ boek (html). Beeld. URL besoek op 22 Februarie 2012.
- ↑ Groenewald, Pieter (28 Augustus 2018). "VF Plus-hoofkantoor vernoem na voormalige leier dr. Pieter Mulder". VF Plus. Geargiveer vanaf die oorspronklike op 9 Oktober 2019. Besoek op 29 Augustus 2018.