Elf (vis)
'n Elf (Pomatomus saltatrix) is 'n vis wat aan beide kante van die Atlantiese Oseaan voorkom. In Suider-Afrika kom die vis voor van Valsbaai tot by Mosambiek, asook by Madagaskar. Dit kom ook wyd voor by Oman, die Middellandse See, Nieu-Seeland, Australië en die Maleisiese skiereiland. In Engels staan die vis ook oor die algemeen bekend as elf maar in KwaZulu-Natal word die vis shad genoem.
| Elf | |
|---|---|
| |
| Wetenskaplike klassifikasie | |
| Domein: | |
| Koninkryk: | |
| Filum: | |
| Subfilum: | |
| Infrafilum: | |
| Superklas: | |
| Klas: | |
| Subklas: | |
| Infraklas: | |
| Superorde: | |
| Orde: | |
| Suborde: | |
| Superfamilie: | |
| Familie: | |
| Genus: | Pomatomus Lacépède, 1802
|
| Spesie: | P. saltatrix
|
| Binomiale naam | |
| Pomatomus saltatrix (Linnaeus, 1766)
| |
Voorkoms
wysig
Die vis is groenerig aan die bokant en silwer aan die onderkant. Die vis word tot 1,2 m lank en weeg dan 15 kg.
Habitat en gewoontes
wysigDie vis leef in kuswater; die onvolwasse vissies en die volwasse visse word soms ook in riviermondings gevind. Die vis is 'n dodelike roofvis wat beïndruk met sy spoed en vaardigheid en is gewild as 'n besonderse sportvis onder hengelaars. Die naam saltatrix beteken dansende meisie na aanleiding van sy gewoonte om uit die water te spring as hy prooi jag of as hy gevang word.
Dit is 'n vleisetende en vraatsugtige vis met skerp tande wat leef op skole makriel, harder en sardyne. Wanneer dié vis vreet jaag hulle skole visse en word beserk; hulle val die skole in groepe aan, swem deur die skool en byt en hap na links en regs amper soos haaie of varswater piranhas. Die volwasse visse vreet hoofsaaklik vis en ook garnale en tjokka. Die onvolwasse visse vreet 'n verskeidenheid skaaldiere, vis en koppotiges (kefalopodes).
Gedurende die winter migreer die Elf van die suidkus tot by KwaZulu-Natal waar die wyfies kuit skiet gedurende September tot Desember. Die pelagiese larwes word dan deur die Agulhasstroom suidwaarts geneem waar die onvolwasse vissies hul eerste jaar deurbring; in riviermondings en digby die strand.
Hengelvis
wysigDie vis se tande is so skerp dat 'n hengelaar sy vingers kan oopsny tot op die been indien hy nie versigtig is wanneer die hoek uit die vis se bek gehaal word nie. Elwe mag nie tussen 1 Oktober en 30 November in Suid-Afrika gevang word nie, om sodoende die populasie te beskerm in broeityd.
Die vis is eetbaar vars of gerook. Die vleis word egter vinnig sag en kan nie lank gebêre word nie. Die vis moet onmiddellik gebloei en in ys geplaas word na dit gevang is.
Sien ook
wysigBronne
wysig- Ensiklopedie van Suidelike Afrika, Eric Rosenthal, 1967.
- Gids tot die kusgebiede van Suid-Afrika. Jacana Media. 2007. ISBN 978-1-77009-215-0
- Sea Fishes of Southern Africa. Rudy van der Elst & Dennis King. 2006. ISBN 978-1-77007-345-6
- Coastal Fishes of Southern Africa. Phil & Elaine Heemstra. 2004. ISBN 1-920033-01-7