Italiaanse Rugbyfederasie
Die Italiaanse Rugbyfederasie (Italiaans: Federazione Italiana Rugby, afgekort “FIR”) is die bestuursliggaam wat rugby in Italië beheer. Die unie is by Wêreldrugby geaffilieer en organiseer verskeie nasionale spanne, insluitend Italië se nasionale seniormansrugbyspan (Azzurri), vroue en jeug. Saam met die Engelse Rugbyvoetbalunie, die Franse Rugbyfederasie, die Ierse Rugbyvoetbalunie, die Skotse Rugbyunie en die Walliese Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond. Die FIR hou ook toesig oor Sewesrugby in Italië en aangesien dit ’n Olimpiese sportsoort is, werk hulle met die Italiaanse Nasionale Olimpiese Komitee saam.
| Italiaanse Rugbyfederasie | |
|---|---|
 Kenteken van die Italiaanse Rugbyfederasie
| |
| Italiaanse naam | Federazione Italiana Rugby |
| Afkorting | FIR |
| Land |  Italië
|
| Sportsoorte | Rugby, Sewesrugby |
| Gestig op | 28 September 1928 |
| Gestig in | Rome, Italië |
| Lid van | Wêreldrugby |
| Aangesluit in | 1987 |
| Vastelandse beheerliggaam | Rugby Europa |
| President | Alfredo Gavazzi |
| Setel | Stadio Olimpico, Rome, Italië |
| Amptelike taal | Italiaans |
| Amptelike webwerf | federugby.it |
Die FIR het in 1928[1] uit die “Propagandakomitee” ontstaan en in 1987 by die Internasionale Rugbyraad (IRR, nou Wêreldrugby) aangesluit.[2] Die hoogste rugbyliga in Italië is die Campionato di Eccellenza, waaraan twaalf spanne deelneem. Van die spanne is veral uit die twee rugbyvestings Lombardye en Veneto afkomstig.
Bo die nasionale kampioenskap word die internasionale liga Pro14 uitgespeel, saam met spanne uit Ierland, Skotland, Suid-Afrika en Wallis, waaraan twee Italiaanse spanne (Benetton Rugby Treviso uit Treviso en Zebre uit Parma) deelneem. Bo die Pro14 word jaarliks saam met klubs uit Engeland, Frankryk, Ierland, Ierland en Wallis die Europese Rugbykampioenskapbeker en die Europese Rugbyuitdagingsbeker uitgespeel.
Naas die amptelike nasionale span roep die FIR ook ander keurspanne byeen. Italia Emergenti (“Opkomende Italië”) is die tweede nasionale span van Italië. Nes ander rugbynasies beskik Italië oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[3][4] Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting.
Nes Argentinië is Italië die enigste van die tien Vlak 1-rugbyspanne wat tot dusver nog nie ’n wedstryd tydens ’n rugbywêreldbekertoernooi gehuisves het nie, alhoewel hulle vir beide die Rugbywêreldbeker 2015 en Rugbywêreldbeker 2019 aansoek gedoen het.[5][6]
VerwysingsWysig
- ↑ (it) "Federazione Italiana Rugby". Italiaanse Rugbyfederasie. Besoek op 7 April 2021.
- ↑ (en) "Member Unions". Wêreldrugby. Besoek op 7 April 2021.
- ↑ (en) "Italy U20". Sesnasies. Besoek op 7 April 2021.
- ↑ (en) "World Rugby U20 Championship". Wêreldrugby. Besoek op 7 April 2021.
- ↑ (en) "Italian rugby chief wades into euro row". ESPNscrum. 20 September 2012. Besoek op 7 April 2021.
- ↑ (en) "IRB confirm 2015 & 2019 host bids". BBC. 15 Augustus 2008. Geargiveer vanaf die oorspronklike op 1 September 2019. Besoek op 7 April 2021.