Skotse Rugbyunie
Die Skotse Rugbyunie (Engels: Scottish Rugby Union, afgekort “SRU”; Skots-Gaelies: Aonadh Rugbaidh na h-Alba) is die bestuursliggaam wat rugby in Skotland beheer. Dit is die tweede oudste Rugbyunie, in 1873 gestig as die “Scottish Football Union”.[1]
| Skotse Rugbyunie | |
|---|---|
 Kenteken van die Skotse Rugbyunie
| |
| Engelse naam | Scottish Rugby Union |
| Afkorting | SRU |
| Skots-Gaeliese naam | Aonadh Rugbaidh na h-Alba |
| Land |  Skotland
|
| Sportsoorte | Rugby, Sewesrugby |
| Gestig op | 3 Maart 1873 |
| Gestig in | Glasgow, Skotland |
| Lid van | Wêreldrugby |
| Aangesluit in | 1886 (Stigtingslid) |
| Vastelandse beheerliggaam | Rugby Europa |
| President | Ian Barr |
| Setel | Murrayfield-stadion, Glasgow, Skotland |
| Amptelike tale | Engels en Skots-Gaelies |
| Amptelike webwerf | scottishrugby.org |
Die unie is by Wêreldrugby geaffilieer en organiseer verskeie nasionale spanne, insluitend Skotland se nasionale seniormansrugbyspan, vroue en jeug, asook die nasionale ligastelsel wat as die “Scottish League Championship” bekendstaan. Saam met die Engelse Rugbyvoetbalunie, die Franse Rugbyfederasie, die Ierse Rugbyvoetbalunie, die Italiaanse Rugbyfederasie en die Walliese Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond. Die SRU hou ook toesig oor Sewesrugby in Skotland en aangesien dit ’n Olimpiese sportsoort is, werk hulle met die Britse Nasionale Olimpiese Komitee saam. Die Skotse Rugbyunie het reeds as medegasheer van belangrike toernooie soos die rugbywêreldbekers in 1991 en 1999 (albei saam met die ander destydse Vyfnasies), asook die Rugbywêreldbeker 2007 (saam met Frankryk en Wallis) opgetree.
Die SRU is in 1873 as Skotse Voetbalunie (Scottish Football Union, SFU) gestig[2] en is naas die Engelse Rugbyvoetbalunie (RFU) die tweede oudste beheerliggaam in die rugbygeskiedenis. In 1886 het die SFU saam met die Ierse Rugbyvoetbalunie (IRFU) en die Walliese Rugbyunie (WRU) die Internasionale Rugbyraad (IRR), die huidige Wêreldrugby, gestig.[3] Sedert 1924 dra die Skotse beheerliggaam sy huidige naam. Die belangrikste rugbyliga in Skotland is die Pro14, waaraan 14 spanne uit Ierland, Italië, Skotland, Suid-Afrika en Wallis deelneem, waaronder die twee Skotse spanne Edinburgh Rugby en Glasgow Warriors. Benede word die Skotse Premierskap tussen tien spanne uitgespeel. Bo die nasionale kampioenskap word jaarliks saam met klubs uit Engeland, Frankryk, Ierland, Italië en Wallis die Europese Rugbykampioenskapbeker en die Europese Rugbyuitdagingsbeker uitgespeel.
Naas die amptelike nasionale span roep die SRU ook ander keurspanne byeen. Scotland A is die tweede nasionale span van Skotland. Nes ander rugbynasies beskik Skotland oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[4][5] Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Skotland beskik oor ’n nasionale span vir skoliere, die Schoolboys, wat as ’n voorbereiding op die Skotse nasionale rugbyspan dien.
Dit word as ’n groot prestasie beskou om saam met die Britse en Ierse Leeus na die Suidelike Halfrond te toer, waar hulle sowat al om die vier jaar teen die Nieu-Seelandse All Blacks, die Suid-Afrikaanse Springbokke of die Australiese Wallabies speel.[6]
VerwysingsWysig
- ↑ (en) "History of the game". Engelse Rugbyvoetbalunie. Geargiveer vanaf die oorspronklike op 10 Januarie 2014. Besoek op 11 Mei 2014.
- ↑ (en) "History". Skotse Rugbyunie. Besoek op 7 April 2021.
- ↑ (en) "Member Unions". Wêreldrugby. Besoek op 7 April 2021.
- ↑ (en) "Scotland U20". Sesnasies. Besoek op 7 April 2021.
- ↑ (en) "World Rugby U20 Championship". Wêreldrugby. Besoek op 7 April 2021.
- ↑ (en) "British & Irish Lions". Britse en Ierse Leeus. Besoek op 7 April 2021.