Laerskool Jan Celliers
Laerskool Jan Celliers is 'n privaat Afrikaanse laerskool geleë in Onderparkrylaan oorkant die Dieretuinmeer in Johannesburg.
Die natuurlike voedingsgebied van die skool is voorstede soos Parkview, Parkwood, Saxonwold, Houghton en Dunkeld. Baie van die skool se leerders kom egter van Fairland, Linden, Northcliff, Aucklandpark en van so ver as Bryanston, Vereeniging, Ennerdale en die Oos-Rand.
Geskiedenis
wysigDie laerskool, genoem na die gevierde Afrikaanse digter Jan F.E. Cilliers, is in 1935 gestig. Dis geleë in die boomryke omgewing van die Dieretuinmeer in Johannesburg, en spog met 'n ryk geskiedenis. Op 13 Desember 1933 het 'n twaalftal ouers onder voorsitterskap van mnr. J. E. Reeler, die eerste vergadering gehou om die stigting van 'n Afrikaansmediumskool in die oorwegend Engelssprekende noordelike voorstede te bespreek. Daar was in dié tyd, onder leiding van die Handhawersbond, 'n sterk gevoel om Afrikaanse kultuur in Johannesburg uit te bou.
'n Volle jaar het verloop voor die Noordelike Voorstedeskool, soos dit aanvanklik bekend was, uiteindelik op 16 Januarie 1935 in die Vrymesselaarsaal in Parktown-Noord geopen is. Mnr. C. B. Linder is aangestel as hoof en hy is in 1942 deur mnr. B Havenga opgevolg. Op die eerste dag is 45 leerlinge ingeskryf en die skool kon met 'n personeel van drie begin. Die skooldrag is toe al ingestel: groen, om die jeugdige daadkrag voor te stel, met die leuse: GROEI, wat op die toekomsmoontlikhede van die skool dui.
Eers op 12 Oktober 1936 is die skool herdoop tot die Jan Celliersskool en heelwat later, op 26 November 1938, kon die sierlike skoolgebou in die Kaaps-Hollandse StylKaaps-Hollandse styl met 'n Groot Constantia-gewel, en die saal ingewy word.
Inhuldiging
wysig'n Besondere gebeurtenis in die geskiedenis van die skool was 'n huldigingsaand vir Jan Celliers op 9 April 1937 wat deur sowat 800 mense bygewoon is. Behalwe Jan Celliers, was persoonlikhede soos Totius en Anton van Wouw teenwoordig. 'n Portretskildery van Jan Celliers deur W. H. Coetzer is onthul deur Annette Theron. Ná mnr. B. Havenga is mnr. A. Pienaar in 1945 aangestel. Hy sou die skool vir 23 jaar bestuur voor mnr. J. B. Senekal in 1968 aangestel is.
Die skool het gaandeweg 'n kultuursentrum in die noordelike voorstede geword. Die terrein is deur die bemiddeling van dr. S. Kuschke vergroot en kon toe ten volle voorsien in die behoeftes van die skool. Vandag is die Laerskool Jan Celliers landwyd bekend as 'n voortreflike skool. Die standaarde wat hier gehandhaaf word, is alombekend en dit was dus amper vanselfsprekend dat die skool in privatisering belang sou stel. Mnr. Senekal, wat hom beywer het vir hierdie saak, het in 1992, ná 24 jaar se diens by die skool, afgetree.
In Januarie 1993 het die skool amptelik privaatskoolstatus gekry - die eerste Afrikaansmedium privaatskool in die land en lid van die Vereniging van Privaatskole in Suid-Afrika (The Independent Schools' Council). 'n Nuwe hoof, mev. A. B. Pretorius, is terselfdertyd aangestel. Mnr. G. K. Keyter is in 2006 aangestel as die nuwe hoof.
Leerplan
wysigDie huidige leerplan sluit die aanvangsonderrig vir die grade in en sien soos volg daar uit:
- Afrikaans (eerste taal)
- Engels (eerste taal)
- Wiskunde
- MSW (Aardrykskunde en Geskiedenis)
- Algemene Wetenskap (skeikunde, natuurkunde en biologie)
- Zoeloe (vanaf gr. 3)
- Omgewingsleer (gr. 1 tot gr. 3)
- Gesondheidsopvoeding
- Klasmusiek (waardering, notasie, ritme, blokfluit en Orff-instrumente)
- Kunsopvoeding (met beklemtoning van die intellektuele ontwikkeling wat kuns meebring)
- Bybelonderrig
- Liggaamlike Opvoeding
- Inligtingkunde
- Rekenaarsgeletterdheid (vanaf gr.0)
- Tegnologie (vanaf gr.1)
- EBW (Ekonomiese Bestuurs Wetenskap (Slegs gr.7)
Addisionele aktiwiteite sluit in:
- Spraak en Drama
- Koormusiek
- Duits
- Wetenskap Klub
- Tegno-klub
Sportgeriewe
wysigGeriewe word vir die volgende sportsoorte aangebied:
Eksterne skakels
wysig26°11′42″S 28°02′01″O / 26.194876675795218°S 28.033676147460938°O