Wikipedia

Planete in astrologie

Ruimtewesens: is daar lewe op under planet, hoe verskil hulle van die mens

Met planete in astrologie is voor die moderne tyd uitsluitend die 7 klassieke planete uit die astrologie bedoel. Die hemelliggame wat deur die ou Babiloniërs met die blote oog gesien kon word, is: Son, Maan, Mercurius, Venus, Mars, Jupiter en Saturnus. Die Son en Maan is toe in die astrologie ook as planete beskou. Met die ontwikkeling van al hoe sterker teleskope is nuwe planete verder as Saturnus ontdek. Dié "transsaturnale planete" is Uranus, Neptunus en die dwergplaneet Pluto.

Van links: Mercurius-Venus-Aarde-Mars-Jupiter-Saturnus-Uranus-Neptunus

Vir die astroloë uit die oudheid, wat die "swerwers" aan die hemelruim waargeneem het, het die planete die wil van die gode verteenwoordig. Hulle het, nes in ander vorme van waarsêery, probeer om tekens aan die hemel te vind van dinge wat op aarde sou gebeur. Hierdie gebeurtenisse, soos sons- en maansverduisterings, het hulle dan in verband gebring met die lot van hul land en hul heerser. Vir moderne astroloë verteenwoordig die planete eerder dryfvere en impulse van die menslike psige. Die plek van die planete in die astrologie stem ooreen met hul plek aan die hemelruim (in die Diereriem), waarvan die twaalf huise die lewensgebiede verteenwoordig waarop hierdie gebeurtenisse sou plaasvind of waarop hierdie dryfvere uiting sou vind. Ook die hoeke van die planete met betrekking tot mekaar, die aspekte, gee die astroloog aanwysings oor energieë wat saamwerk of mekaar teenwerk.

Simboliek van die 7 klassieke planete

wysig

Opmerking: Die karaktertrekke het nie noodwendig betrekking op mense nie. Die sleutelwoorde beskryf karaktertrekke en assosiasies wat in aanmerking geneem word by die ontleding van horoskope.

Son  

wysig
 
  • Apollo (Romeins), Helios (Grieks)
  • Heerser van die Leeu, in vernietiging in die Waterdraer, in verhoging op graad 19 van die Ram, in val in die Weegskaal.[1] Heerser van die vyfde huis.
  • Klassiek:[2] Warm, droog, manlik, goed; soms ook arrogant, trots. Groot gebou, sterk, getrou, eervol, groothartig. Kleure: geel, goud. Plante: welriekende plante met geel of rooi blomme, op sonnige plekke. Hierdie plante versterk die hart en werk kwaadaardige invloede teen. Diere: leeu, perd, krokodil, bok. Visse: krap. Voëls: arend, haan, feniks, nagtegaal, pou, swaan. Plekke: huise, koninklike howe, teaters, paleise. Minerale en metale: goud. Stene: chrisoliet. Dag: Sondag.
  • Modern: Die ego, die lewenswil, lewenskragtigheid.[3] Verdere assosiasies: die kern van die persoonlikheid en van die IK, selfbevestiging, selfversekerdheid, geldingsdrang en magshonger, kragsentrum, energiebron van die persoonlikheid.[4]

Maan  

wysig
 
  • Diana (Romeins), Selene (Grieks)
  • Heerser van die Kreef, in vernietiging in die Steenbok, in verhoging op graad 3 van die Bul, in val in die Skerpioen.[1] Heerser van die vierde huis.
  • Klassiek:[2] Vroulike, nagtelike planeet, koud, vogtig en flegmaties. As persoon iemand van gemiddelde bou, bleek, met ronde gesig, grys oë, harig. Kleur: wit of liggeel, silweragtig. Plante: met sagte, vogtige blare, kool en spanspek. Diere: otters, wesels, eende, diere wat by die water hou. Plekke: velde, fonteine, baddens, hawens, verlate plekke. Mineraal: silwer. Stene: sagte stene, seleniet, kristalle. Dag: Maandag.
  • Modern: Die siel, die vroulike beginsel, die moeder.[3] Verder word die maan geassosieer met instink, groei, verandering, kindertyd, kinderlikheid, die vermoë om jonk te wees, die onbewuste, drome, fantasie, openheid, stemmings en wisseling van stemmings, kwesbaarheid, die vermoë om te kan ontvang en vry te laat, spontaniteit, ritmiese besieling, gevoel, tradisie, familiesin, voortdurende verandering.[4]

Mercurius  

wysig
 
  • Mercurius (Romeins), Hermes (Grieks)
  • Heerser van die Tweeling en Maagd, in vernietiging in die Boogskutter en die Visse, in verhoging op graad 15 van die Maagd, in val in die Visse.[1] Heerser van die derde en sesde huis.
  • Klassiek:[2] Nóg manlik nóg vroulik, wissel na gelang van die planeet naby aan hom (konjunksie); koud en droog, melankolies. Saam met goeie planete is hy goed, anders sleg. As persoon subtiel en polities intellektueel, ’n uitstekende redenaar, geleerd argumenterend, ’n ondersoeker van allerhande geheimenisse, skerp en geestig, leer self. Kan uitblink in enige wetenskap. As handelaar onoortreflik. Liggamlik lank, regop, skraal, met ’n hoë voorkop, helder oë, dun lippe en neus, min hare op die ken, maar baie op die kop, lang arms en vingers. Beroep: filosoof, geleerde, wiskundige, astroloog, handelaar, advokaat. Kleur: gemengde kleure, grys met ligblou soos ’n duif. Plante: met verskillende kleure, op sanderige verlate plekke, met min of geen geur. Bone, longkruid. Diere: hiëna, aap, vis, eekhoring, wesel, spinnekop, slang. Voëls: papegaai, kraanvoël. Minerale: kwiksilver. Stene: topaas, agaat, alle stene met verskeie kleure. Dag: Woensdag.
  • Modern: Die intellek, kreatief in sy denke en kommunikasie.[3]

Venus  

wysig
 
  • Venus (Romeins), Afrodite (Grieks)
  • Heerser van die Bul en Weegskaal, in vernietiging in die Skerpioen en Ram, in verhoging op graad 27 van die Visse, in val in die Maagd.[1] Heerser van die tweede en sewende huis.
  • Klassiek:[2] Vroulike planeet, gematig koud en vogtig, skepper van geluk en plesier. As persoon aangenaam, netjies, strewend na skoonheid in woord en daad, dikwels betrokke by liefdesake, musikaal, nie baie fluks nie en eerder op plesier ingestel, nogal liggelowig, owerspelig en verkwistend. Nie baie groot gebou nie, bleek, met ’n ronde gesig, mooi helder oë, mooi hare, lieflike mond, mooi liggaam. Beroepe: Dikwels musikant, skilder, juwelier, sanger, graveur, handskoenmaker, beroepe wat met sierade, klere, vrouesake verband hou. Kleur: wit, liggroen en ligbruin. Smake: alles wat aangenaam, soet en vogtig is. Plante: groen, geurig, wit, soet appels, wit rose, vye, appelkose, pruime, rosyne. Diere: luiperd, kleinvee, spreeu, bok, hen, patrys, adelaar, dolfyn. Plekke: fonteine, bruidskamer, beddens, dansskole, kleedkamers. Metale en minerale: koper, brons, blou saffier, wit en rooi koraal, albaster, beril. Dag: Vrydag.
  • Modern: Liefde, kuns, ’n harmoniese gevoel, fisieke aantrekkingskrag, skoonheid, positiewe ingesteldheid.[3]

Mars  

wysig
 
  • Mars (Romeins), Ares (Grieks)
  • Heerser van die Ram en Skerpioen, in vernietiging in die Weegskaal en Bul, in verhoging op graad 28 van die Steenbok, in val in die Kreef.[1] Heerser van die eerste en agtste huis.
  • Klassiek:[2] Manlike, nagtelike planeet, warm en droog, vurig, veroorsaak minder ernstige kwaad, aanstoker van rusies en oorlog. In gevegte onoorwinlik, uitdagend, onredelik, gehoorsaam niemand. Indien sleg geplaas (in die horoskoop) word hy ’n slagter, moordenaar en dief, verraaier, onmenslik, obseen, haastig, onderdrukkend. Gemiddelde bou, sterk liggaam en stewige beendere, met ’n ronde gesig, rooi of ligte hare, dikwels gekrul, ’n aktiewe en gevreesde man. Beroepe: soldaat, generaal, dokter, apteker, chirurg, slagter, kleremaker, kok. Kleure: rooi, geel, vurig en blink. Smaak: bitter, skerp en brandend. Plante: met rooi, skerp getande blare, groei op droë plekke, soos netel, peper, radys. Diere: luiperd, vos, perd, bok, wolf, vlieg, beer, uil, kraai. Plekke: smidswinkels, oonde, slaghuise, skoorstene, oral waar steenkool verbrand word. Minerale: yster, swawel. Dag: Dinsdag.
  • Modern: Energie, die manlike beginsel, wilskrag, moed, vasberadenheid, veglus.[3]

Jupiter  

wysig
 
  • Jupiter (Romeins), Zeus (Grieks)
  • Heerser van die Boogskutter en Visse, in vernietiging in die Maagd en Tweeling, in verhoging op graad 15 van die Kreef, in val in die Steenbok.[1] Heerser van die negende (en twaalfde) huis.
  • Klassiek:[2] Dagplaneet, manlik, gematig warm en vogtig, bring groot fortuin, bewerkstellig gematigheid, beskeidenheid, soberheid en regverdigheid. In die omgang eervol, getrou, regverdig in die liefde, verrig roemryke dade, gesels lekker, is verdraagsaam teenoor vroue en kinders, toon respek teenoor ouer mense, glo in liefdadigheid, godsdienstig, liberaal, verafsku gemeenheid, wys, versigtig, dankbaar, deugsaam. Kan onverdraagsaam of hipokrities godsdienstig wees. Is regop en groot gebou, met ’n digte baard, groot maag, sterk dye en bene, lang voete, groot oë, ligte vel, het gewoonlik ’n geboortevlek of litteken op die regtervoet. Geure: soet en aangenaam. Kleure: seeblou, purper, mengsel van geel en groen. Plante: klawer, foelie, neutmuskaat, vlas, pimpernel, oregano, granate, madeliefie, saffraan. Diere: os, skaap, olifant, draak, tier, eenhoring, alle diere wat saggeaard is, ooievaar, adelaar, bye, fisant, dolfyn, walvis. Stene: ametis, saffier, smarag, marmer. Plekke: bly graag naby kerke en altaars, sinodes, vergaderings, regsgeboue. Dag: Donderdag.
  • Modern: Harmonie, die reg, godsdiens, die dryfkrag om homself te ontwikkel, optimisme.[3]

Saturnus  

wysig
 
  • Saturnus (Romeins), Kronos (Grieks)
  • Heerser van die Steenbok en Waterdraer, in vernietiging in die Kreef en Leeu, in verhoging op graad 21 van die Weegskaal, in val in die Ram.[1] Heerser van die tiende (en elfde) huis.
  • Klassiek:[2] Dagplaneet, koud en droog, melankolies, aards, manlik, het groot ongeluk, bewerksteller van eensaamheid. Ernstig en streng in sy houding, praat spaarsaam, werk geduldig, nougeset, stuurs en sober, kan ook afgunstig, wantrouig en koppig word, ’n veragter van vroue, nooit tevrede, altyd klaend. Sy liggaam is koud en droog, gemiddelde bou, bleek, klein donker oë, breë voorkop, swart of vaal hare, groot ore, lae wenkbroue, dun of geen baard, dik lippe en neus, vooroorgebuigde houding, vreemde loop met knieë wat teen mekaar stamp. Beroep: nagwerk of onder die grond soos mynwerker, loodgieter, skoorsteenveër; tuinier, koster, grafgrawer, skaapwagter. Smake: suur, bitter, skerp. Plante: wolfsklou, alruin, bilsekruid, dragon, ysterkruid, salie, spinasie, komyn, die sipres en treurwilger. Diere: esel, kat, haas, muis, mol, olifant, beer, wolf, krokodil, paling, kraai, uil, sprinkaan, volstruis. Plekke: bly graag in woestyne, woude, donker valleie, grotte, berge, ruïnes. Stene: saffier, alle swart, dowwe, lelike gesteentes wat nie gepoleer kan word nie. Dag: Saterdag.
  • Modern: Geremdheid, konsentrasie, konsolidasie, erns, melankolie, verantwoordelikheid.[3]

Simboliek van die 3 transsaturnale planete

wysig

Uranus  

wysig
 
  • Coelus (Romeins), Oeranos (Grieks)
  • Moderne heerser van die Waterdraer, in vernietiging in die Leeu, in verhoging in die Skerpioen, in val in die Bul.[1] Heerser van die elfde huis.
  • Rewolusie, skielike verandering, eienaardige gedrag, vryheidsdrang, entoesiasme en oorspronklikheid, intuïsie.[3]

Neptunus  

wysig
 
  • Neptunus (Romeins), Poseidon (Grieks)
  • Moderne heerser van die Visse, in vernietiging in die Maagd, in verhoging in die Kreef, in val in die Steenbok.[1] Heerser van die twaalfde huis.
  • Ontvanklik vir indrukke, empatie, fantasie, gevoeligheid, dromerigheid, mistisisme.[3]

Pluto  

wysig
 
  • Pluto / Orcus (Romeins), Hades (Grieks)
  • Moderne heerser van die Skerpioen.
  • Voorsienigheid, onsigbare groot kragte (onbewus) aan die werk, die wil om te onderdruk, ontsien niks.[3] Heerser van die agtste huis.

Verwysings

wysig
Hierdie artikel is merendeels vertaal vanaf die Nederlandse Wikipedia-artikel nl:Planeten in de astrologie
  1. ↑ 1,0 1,1 1,2 1,3 1,4 1,5 1,6 1,7 1,8 Tabel van Ptolemaeus in "Christian Astrology" van William Lilly, hoofstuk 19 An introduction to astrology op bl. 104
  2. ↑ 2,0 2,1 2,2 2,3 2,4 2,5 2,6 Volgens William Lilly, Christian Astrology Book I
  3. ↑ 3,00 3,01 3,02 3,03 3,04 3,05 3,06 3,07 3,08 3,09 Reinhold Ebertin: 'De Combinatie van Planeetinvloeden'
  4. ↑ 4,0 4,1 Ellynor Barz: 'Goden en planeten'
Ontsluit van "https://af.wikipedia.org/w/index.php?title=Planete_in_astrologie&oldid=2646665"