Charlie Hofmeyr
Charles James Hofmeyr (Hanover, 11 Julie 1888 – Kaapstad, 31 Maart 1954) was hoofinspekteur van onderwys in Kaapland en onder meer van 1918 tot 1924 hoof van die hoërskool op Ceres, wat sedert 1949 as die Hoërskool Charlie Hofmeyr bekendstaan. Hy is ook bekend vir die kinderverse wat hy geskryf het.
Afkoms
wysigCharlie Hofmeyr was een van die vyf kinders uit ds. Arend Hofmeyr (1837–1903) van die NG gemeente Hanover se tweede huwelik, met Jane Gray Wright (Skotland, 25 Augustus 1850 – Stellenbosch, 27 Oktober 1940) op 17 Desember 1884 op Somerset-Oos. Hofmeyr was ’n kleinseun van Arend Hermanus Hofmeyr (Kaapstad, 17 April 1802 – Somerset-Oos, 9 Maart 1887) van die landgoed Waterhof in die Kaapse stadskom, ’n kleinseun van die Hofmeyr-stamvader Johann Heinrich Hofmeyr (Ibbenbüren, Münster, Noordryn-Wesfale, 17 Maart, 1721 – Kaapstad, 4 Julie 1805). Die stamvader het twee seuns gehad, Jan Hendrik (1759–1838), van wie Charlie Hofmeyr ’n agter-agterkleinseun was, en Stephanus Johannes Hofmeyr (1760–1826). Die politieke leier Jan Hendrik Hofmeyr was ’n neef van Charlie Hofmeyr se oupa, ’n bekende bankier in die Moederstad. Voor sy geboorte was sy vader getroud met Louisa Adriana (Wiesie, 1845–1883), met wie hy op 20 Oktober 1868 in die Paarl in die huwelik bevestig is. Sy was een van die sewe dogters van Adriaan Jacobus Louw van die Paarl wat met ’n predikant getrou het, terwyl een van haar drie broers, Attie Louw (1859–1935), 38 jaar lank predikant was van die Heidelberg, Tvl. Danksy dié verwantskap het Charlie Hofmeyr, buiten ds. Attie Louw, nog ses predikant-ooms gehad: prof. Nicolaas Hofmeyr,[1] ds. J.R Albertyn,[2] ds. George Murray,[3] prof. C.F.J. Muller,[4] ds. J.C. Truter,[5] en ds. P.G.J. Meiring. Vyf van sy neefs van Somerset-Oos het predikant geword: Lou, Charlie, John, Georg en Andrew en benewens George Murray, nog vier van sy oom Jan Hendrik se swaers: John, Andrew, William en Charles. Van sy halfbroers uit sy vader se eerste huwelik, het Attie ’n legendariese sendeling in Njassaland geword en Jan ’n mediese sendeling in Noord-Rhodesië. Sy eie broer Willie was ’n tyd lank onderwyser in Njassaland, sy suster Issie het na dieselfde kolonie gegaan waar sy met die sendingboer Frikkie van Eeden getrou het en Lily het deur haar huwelik met ds. Kotie Retief van Njassaland ook die sendingsaak gedien. Sy jongste twee susters, Jeanette en Annie, was albei ongetroud en albei dosent aan die Universiteit van Stellenbosch. Hul moeder was voor haar huwelik skoolhoof van die Bellevue-seminarie (meisieskool) op Somerset-Oos. Sy halfsuster Maria (1875–1971) was getroud met ds. Andrew Murray McGregor, leraar van die NG gemeente Drieankerbaai van 1914 tot 1939, die kerk waarin Charlie Hofmeyr getroud is.
Lewensloop
wysigCharles James Hofmeyr was op 11 Julie 1888 op Hanover gebore as een van vyf kinders van ds. Arend Hermanus Hofmeyr (1837-1904) en Jane Gray Wright (1850-1940), skoolhoof van die Bellevue-Seminarie op Somerset-Oos. Sy ma is sy pa se tweede vrou en hulle is op 17 Desember 1884 op Somerset-Oos met mekaar getroud
Ná sy skool- en universiteitsopleiding was Charlie Hofmeyr eers onderwyser aan die hoërskool op Wellington en reeds van 1918 tot 1924 hoof van die hoërskool op Ceres. Hier het hy onskatbare dienste gelewer en dié skool staan dan ook vanaf 1949 gepas as die Hoërskool Charlie Hofmeyr bekend. Die skoolblad van daardie jaar getuig: “Dit is vir ons ’n voorreg om hierdie uitgawe van ons jaarblad op te dra aan mnr. Charlie Hofmeyr.”
Van 1925 af was hy 30 maande lank hoof van die Hoër Seunskool op Malmesbury. Daarna het hy inspekteur van skole geword, agtereenvolgens van kringe in die Karoo en op Humansdorp, in die Paarl en in Kaapstad. In 1938 het hy hoofinspekteur met eerste verantwoordelikheid die toesig oor die opleiding van wit en bruin onderwysers geword. In dié verband het hy tot die besef van die groot behoefte, veral onder laasgenoemdes, aan sy opbouende belangstelling gekom.
Ná sy aftrede in 1948 was hy regstreeks betrokke by die verspreiding van goeie boeke ter aanvulling van die leerplanne van skole.
Hy is op 31 Maart 1954 in Kaapstad oorlede.
Gesinslewe
wysigCharlie Hofmeyr was getroud met Johanna Wilhelmina Lotter (1892–1974), ’n boorling van Klerksdorp. Twee kinders is uit dié huwelik gebore: Jeanne Hendrina Albertyn (geb. 1919), joernalis in Kaapstad, en Arend Hermanus (geb. 1926), ingenieur in Johannesburg.
Skryfwerk
wysigHy skryf versies vir kinders wat in “Versies vir die kindertuin” en “Vir die kinders” saamgebundel word. Van sy gedigte word opgeneem in Gerrit Komrij se bloemlesing “Die Afrikaanse poësie in ’n duisend en enkele gedigte” en ook in “Nuwe klein verseboek”, nadat D.J. Opperman vroeër reeds sy gedig “Die skilpad” in “Klein verseboek” opgeneem het. Hy vertaal en verwerk W. Fouché se skoolhandleidings “Taal- stel- en spreekonderwys” vir standerds een tot drie. As samesteller is hy (saam met ander) verantwoordelik vir “Die Volksleesboek”.
Eerbewyse
wysigDie Charlie Hofmeyr Hoërskool op Ceres is in 1949 na hom vernoem.
Publikasies
wysig| Jaar | Publikasies |
|---|---|
| 1919 | Versies vir die kindertuin |
| 1922 | Vir die kinders |
| Samesteller | |
| 1923 | Die Volksleesboek |
Bronne
wysig- (af) (en) Hofmeyr, W. Lou(w); Hofmeyr, Nico J.; Hofmeyr, S.M.; Hofmeyr, George S.; Hofmeyr, Johannes W. (samestellers). 1987. Die Hofmeyrs: 'n Familiegeskiedenis. Lynnwoodrif en Bloemfontein: Die Samestellers.
- (af) Smit, ds. A.P. 1956. Eeufeesalbum Hanover. 'n Oorsig van die geskiedenis van die Ned. Geref. gemeente, asook een en ander oor die dorp en distrik, 1856–1956. Hanover, NG Kerkraad.
Verwysings
wysig- ↑ (en) Besonderhede op Geni.com. URL besoek op 7 Oktober 2015.
- ↑ (en) Besonderhede op Geni.com. URL besoek op 7 Oktober 2015.
- ↑ (en) Besonderhede op Geni.com. URL besoek op 7 Oktober 2015.
- ↑ (en) Besonderhede op Geni.com. URL besoek op 7 Oktober 2015.
- ↑ (en) Besonderhede op Geni.com. URL besoek op 7 Oktober 2015.