Wêreldbeker

'n Wêreldbeker is 'n internasionale byeenkoms van verskeie lande se nasionale spanne wat deelneem om 'n beker of trofee in te palm. Die wenner word vir 'n seker periode as wêreldkampioen gekroon. Die deelnemende lande se nasionale eer is op die spel en alles word uitgehaal om 'n oorwinning te behaal. Die geleenthede lok gewoonlik 'n groot aantal toeskouers en word wêreldwyd gebeeldsend. Wêreldbekertoernooie soos Krieketwêreldbeker, Rugbywêreldbeker en Sokker-Wêreldbeker is van die mees gesiene sportgeleenthede ter wêreld, saam met die Olimpiese Somerspele.

Die trofee waarom tydens krieketwêreldbekertoernooie meegeding word

Die Webb Ellis-beker is op die spel tydens rugbywêreldbekertoernooie

Replika van die FIFA Sokker-Wêreldbekertrofee waarom sedert 1974 meegeding word

Lande soos Engeland (krieket en rugby meer as een keer; sokker in 1966) en Suid-Afrika (rugby in 1995, krieket in 2003 en sokker in 2010) is in die sin uniek dat hulle al die drie groot wêreldbekertoernooie al gehuisves het, en Engeland is tot dusver die enigste land wat daarin geslaag het om al drie te wen (sokker in 1966, rugby in 2003 en krieket in 2019).

Krieketwêreldbeker

Die hoofartikel vir hierdie afdeling is: Krieketwêreldbeker.

Die Internasionale Krieketraad se krieketwêreldbekertoernooi is 'n internasionale krieketkompetisie wat al om die vier jaar gehou word om die krieketwêreldkampioen te bepaal. Die huidige wêreldkampioen is Australië wat die Krieketwêreldbeker 2023 gewen het.

Enkele voorbeelde:

• Krieketwêreldbeker 2003 – Australië wen met 125 lopies teen Indië.
• Krieketwêreldbeker 2015 – Australië wen met 7 paaltjies teen Nieu-Seeland.
• Krieketwêreldbeker 2019 – Engeland wen volgens aantal grenshoue teen Nieu-Seeland, nadat hulle in die eindstryd gelykop gespeel het.
• Krieketwêreldbeker 2023 – Australië wen met ses paaltjies teen Indië.

Rugbywêreldbeker

Die hoofartikel vir hierdie afdeling is: Rugbywêreldbeker.

Wêreldrugby se rugbywêreldbekertoernooi is 'n internasionale rugbykompetisie wat al om die vier jaar gehou word om die rugbywêreldkampioen te bepaal. Die huidige wêreldkampioen is Suid-Afrika wat die Rugbywêreldbeker 2023 gewen het.

Enkele voorbeelde:

• Rugbywêreldbeker 1995 – Suid-Afrika wen met 15–12 teen Nieu-Seeland.
• Rugbywêreldbeker 2007 – Suid-Afrika wen met 15–6 teen Engeland (tweede keer dat Suid-Afrika die Rugbywêreldbeker wen.)
• Rugbywêreldbeker 2019 – Suid-Afrika wen met 32–12 teen Engeland (derde keer dat Suid-Afrika die Rugbywêreldbeker wen.)
• Rugbywêreldbeker 2023 – Suid-Afrika wen met 12–11 teen Nieu-Seeland (vierde keer dat Suid-Afrika die Rugbywêreldbeker wen.)

Sokkerwêreldbeker

Die hoofartikel vir hierdie afdeling is: Sokker-Wêreldbeker.

Die FIFA sokkerwêreldbekertoernooi word al om die vier jaar tussen nasionale spanne (wat lede van FIFA is) uitgespeel. Die huidige wêreldkampioen is  Argentinië wat die FIFA Sokker-Wêreldbekertoernooi in 2022 gewen het.

Enkele voorbeelde:

• FIFA Sokker-Wêreldbekertoernooi in 2010 –  Spanje wen met 1–0 teen  Nederland.
• FIFA Sokker-Wêreldbekertoernooi in 2014 –  Duitsland wen met 1–0 teen  Argentinië.
• FIFA Sokker-Wêreldbekertoernooi in 2018 –  Frankryk wen met 4–2 teen  Kroasië.
• FIFA Sokker-Wêreldbekertoernooi in 2022 –  Argentinië wen met 4–2 ná strafdoele teen  Frankryk.

Ander

Ander wêreldbekerkampioenskappe sluit in:

• Formule Een