NG gemeente Dullstroom

Die NG gemeente Dullstroom was ’n gemeente in die Nederduitse Gereformeerde Kerk se Oostelike Sinode met sy middelpunt op die dorp Dullstroom in Mpumalanga. Dit is ingelyf by die NG gemeente Belfast.

Ds. J.S. Theron, van 1918 tot 1921 die gemeente se eerste leraar, hier afgeneem saam met sy gesin toe hy leraar was van die NG gemeente Prins Albert.
Die NG kerk Dullstroom. Die argitek was Johannes Rienk Burg (6 Maart 18746 Maart 1960), wat in 1895 uit Nederland na die Zuid-Afrikaansche Republiek geëmigreer het. Hy het ook die NG kerk Belfast ontwerp, die gemeente waarby Dullstroom ingelyf is.
Ds. J. Le R. Retief, van 1922 tot 1928 die gemeente se tweede leraar.
Syaansig van die kerkgebou waarvan ds. Paul Nel die hoeksteen op 17 Oktober 1919 gelê het.
Ds. B.J.M. Britz.
Ds. C.B. Brink, leraar van November 1928 tot April 1934, en sy gesin.
Ds. W.H.S. Barnard, leraar van 1937 tot 1943.
Ds. J.P. Grobler, leraar van 1944 tot 1946.
Ds. A.J. Louw, moderator van die Transvaalse Kerk, het die wydingsrede uitgespreek tydens die inwyding van die kerk op 13 November 1920.

Stigting wysig

Dullstroom, die hoogste dorp in Suid-Afrika, is tussen Belfast en Lydenburg bo-op die berge van die destydse Oos-Transvaal geleë. Hier is die gemeente Dullstroom op 1 November 1916 gestig. Dadelik ná die afstigting het hierdie klein gemeente aan die werk gespring om fondse in te samel vir 'n kerk en pastorie.

Op 20 Oktober 1917 is ds. J.S. Theron van Pretoria beroep. Hy neem die beroep aan en word op 12 Januarie 1918 bevestig as die eerste leraar van die gemeente. Hy moes hy die werk doen onder baie moeilike omstandighede aangesien die gemeente nog geen kerk of pastorie gehad het nie. Op 2 April 1919 kon 'n mooi, ruim pastorie egter in gebruik geneem word. 18 Oktober 1919 (volgens Ons gemeentelike feesalbum, maar volgens die steen self 17 Oktober) was vir die gemeente 'n heuglike dag toe die hoeksteen van die nuwe kerk gelê is deur ds. Paul Nel, voorsitter van die Ring van Lydenburg. Die inwyding van die nuwe kerkgebou geskied op 13 November 1920. Die wydingsrede by die geleentheid is uitgespreek deur die Moderator van die Transvaalse Kerk, ds. A.J. Louw.

Nadat ds. Theron deeglike aanvoorwerk gedoen het, neem hy 'n beroep na Pretoria aan en ontvang op 6 Julie 1921 demissie. Ds. J. Le Roux Retief word nou beroep en op 18 Februarie 1922 bevestig. Hy vind die finansies van die gemeente in 'n onbevredigende toestand en sorg dat dit deeglik gereorganiseer word. Ná ses jaar van geseënde arbeid gee sy gesondheid so in dat die kerkraad verplig is om hom op 30 Junie 1928 demissie te verleen.

Op 10 November 1928 word ds. C.B. Brink as leraar van die gemeente bevestig. Nou het die worsteljare van die depressie gekom, wat gedreig het om die gemeente te laat onder gaan. Met harde arbeid en opoffering is hierdie tydperk oorbrug. Die tweede beroep van Witbank neem ds. Brink aan en vertrek op 28 April 1934.

Prop. W.H.B. Ebersohn word nou beroep en op 25 Augustus 1934 bevestig. Ook hy, soos die vorige leraars, het gedurig met die groot kerkskuld te worstel gehad. Hy bearbei die gemeente met seën tot 8 Mei 1937. Na 'n eerste beroep bedank is, neem prop. W.H.S. Barnard die beroep aan. Op 30 Oktober 1937 word hy georden en bevestig. In hierdie tyd was daar veral 'n moeilike stryd teen buitekerklike bewegings. Onder sy leiding wend die gemeente 'n kragtige poging aan en slaag daarin om die kerkskuld baie te verminder. Op 2 Oktober 1943 vertrek hy na die gemeente Vorentoe.

Prop. J.P. Grobler van Turffontein word op 26 Augustus 1944 georden en bevestig in die gemeente. Onder die besef dat 'n langdurige skuldelas die gemeente geestelik dood maak, pak hy hierdie probleem met erns aan, en op 1 April 1945 kon die gemeente die skulddelging feestelik vier. Op 25 Augustus 1946 neem ds. Grobler afskeid van die gemeente en vertrek na Grootfontein.

Ná 'n vakature van sewe maande neem ds. B.J.M. Britz van Koedoesrand die beroep aan en word op 5 April 1947 as leraar van die gemeente bevestig.

Enkele leraars wysig

Bronne wysig

  • Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.
  • Small, Mario (samesteller). 2013. Jaarboek van die NG Kerke. Wellington: Tydskriftemaatskappy van die NG Kerk NPC – 'n divisie van Bybel-Media.

Eksterne skakels wysig