Pieter Willem Bingle

Nota: Moet nie verwar word met Ds. Pieter Bingle (*1883 – †1923) nie.

Dr. Pieter Willem Bingle (Pretoria, 4 Junie 1939 – Kaapstad, 28 Junie 2020) was tussen 1964 en sy emeritaat in 2006 predikant in drie gemeentes van die GKSA, maar word veral onthou vir sy nagenoeg 33 jaar lange dienstyd in sy laaste werkkring, die Gereformeerde kerk Kaapstad. Sy ander twee gemeentes was Carolina (1964–’68) en Pretoria-Wes (1968–’73).

Pieter Willem Bingle
Dr. Pieter Bingle toe hy student aan die PUK was, 1961
Naam	Pieter Willem Bingle
Geboorte	4 Junie 1939 Pretoria, Transvaal
Sterfte	28 Junie 2020 Kaapstad
Kerkverband	Gereformeerd
Gemeente(s)	Carolina, 1964–'68 Pretoria-Wes Kaapstad
Jare aktief	1964–2006
Kweekskool	Potchefstroom
Sendingwerk	Hawesending

Dr. Bingle se lewensfilosofie is: “Leef positief en maak ’n daadwerklike verskil met dade van hoop.”

Herkoms en opleiding

Die studente en professore van die Teologiese Skool Potchefstroom, 1963. Pieter Bingle sit links voor.

Margaretha en Ferdinand Postma en hul drie oudste kinders: Gretchen (O'Grady), Betsie (van der Walt) en Salóme (Lomie Bingle), dr. Bingle se moeder.

Dr. Bingle was die oudste van die ses kinders van wyle prof. Hansie en wyle Salóme Bingle (née Postma) van Pretoria. Johannes Petrus (Hansie) Bingle was 'n seun van ds. Pieter Bingle en sy eerste vrou, Albertje Catharina Andria (née Coetzee, 1879–1919). Salóme Postma was die derde dogter van prof. Ferdinand Postma en Margaretha Coetzee. Prof. Postma was 'n kleinseun van die eerste predikant van die Gereformeerde Kerke in Suid-Afrika, ds. Dirk Postma. Dr. Bingle is dus 'n agteragterkleinkind van ds. Postma.

Hy het sy skoolopleiding ontvang aan die Laerskool Pretoria-Oos en Afrikaanse Hoër Seunskool, Pretoria, waar hy een van drie onderhoofseuns was. Sy universiteitsopleiding het hy aan die destyds PU vir CHO ontvang, waar hy die teologiegrade Th.B. (1963, met lof), Th.M. (1986, met lof) en Th.D. (1989) verwerf het. Sy doktorale proefskrif was getiteld Die betekenis van die eskatologie [eindgebeure] vir die prediking.

Op universiteit het Bingle op die studenteraad gedien en was voorsitter van die kultuurliggaam Korps Veritas Vincet. Hy het as haker vir Wes-Transvaal se o.19-rugbyspan uitgedraf en was kaptein van die Pukke se eerste span in 1963. Af en toe was hy ook haker vir Wes-Transvaal. Hy is in 1963 gekies om as haker te speel vir die gekombineerde span van die Noordelike Universiteite (UP, Wits en PUK) teen die Oxcambs (’n gekombineerde span van die universiteite Oxford en Cambridge, Engeland) op Loftus Versfeld, Pretoria. By geleentheid het hy vir sy universiteit paal gespring. Vroeg in sy bediening het hy in 1965 vir Carolina se eerste dorpspan uitgedraf en ook nog aan paalspring deelgeneem.

Gesinslewe

Hy was getroud met Marianne (née Stigling, gebore 14 Mei 1939), dogter van wyle Hennie en wyle Etta Stigling, oorspronklik van Florida. Uit hul huwelik is vier kinders gebore, Danita, Salóme, Marianne en Johanci, almal oudleerders van die Hoërskool Jan van Riebeeck. Ná sy emeritaat het die egpaar uit Edgemead na Welgelegen, Parow, verhuis.

Bediening

Ná sy legitimering is dr. Bingle in 1964 bevestig in die kombinasie Carolina-Waterval Boven, waar hy sou bly tot 1968, toe hy ’n beroep aanneem na die gemeente Pretoria-Wes in Proklamasieheuwel. Sowat vyf jaar later, in Junie 1973, het hy na die Moederstad verhuis om leraar te word van die Gereformeerde kerk Kaapstad, wat in daardie jaar sy halfeeufees kon vier. Dr. Bingle was 33 jaar later, nadat hy sy emeritaat in Februarie 2006 aanvaar het, verantwoordelik vir die gedenkboek Kerk teen Tafelberg, wat die kerk van Kaapstad se geskiedenis van 1973 tot 2006 met hom as predikant dek.

Een van die hoogtepunte tydens dr. Bingle se lang bediening was toe hy die diens waargeneem het tydens die inhuldiging op 20 September 1989 in die NG kerk Universiteitsoord in Pretoria van een van sy lidmate in die gemeente Kaapstad, F.W. de Klerk, as tweede uitvoerende Staatspresident van Suid-Afrika. Ook sy lidmaatskap van 1973 tot Januarie 2018 van die Hawesending in Tafelbaai, en Biblia, waarvan hy langer as 40 jaar voorsitter was van Maart 1981 tot Desember 2012. Vir Hawesending het hy vier maal internasionale konferensies bygewoon: in 1991 in Vancouver, Kanada, in 1995 in Manila, Filippyne, in 2000 in Orlando, VSA en in 2005 in Hongkong, China. In 1997 het hy die Derde Internasionale Konferensie in Kaapstad se Waterfront gereël. Op uitnodiging het hy in 1991 lesings gegee aan die Christelike Universiteit en Seminarium in Tokio, Japan, aan die Kosin-universiteit in Busan, Suid-Korea, en aan die Harbour Evangelism Seminarium in Seoel, Suid-Korea.

Skrywer

Dr. Bingle was op uitnodiging medewerker van prof. Willie Jonker as skrywer van die rubriek "Geestelike waardes" in die Afrikaanse dagblaaie Die Burger, Beeld en Volksblad. Uit sy pen het talle wetenskaplike en populêr-wetenskaplike artikels in verskillende tydskrifte en publikasies verskyn. Hy was skrywer van:

• God se tolk in die taalvelde van die mens, wat verskyn het met die promosieplegtigheid as kurator van die Teologiese Skool Potchefstroom se finalejaarstudente in teologie op 20 November 1986.
• Biblia – poort na vastelande en eilande, in 2002 uitgegee deur Hawesending Tafelbaai, Houtbaai, Kalkbaai.
• Oranjerivier tot Stormsrivier. Klassis Boland se twintig gemeentes (GKSA-150), uitgegee in 2006.
• Oortrapklippe Deel 1 – 52 vastrapplekke uit die immergroen evangelie van Jesus Christus, in 2011 uitgegee deur Griffel Uitgewers.
• Oortrapklippe Deel 2 – vir verwondering oor God. Nóg 52 vastrapplekke uit die immergroen evangelie van Jesus Christus, in 2013 uitgegee deur Naledi.
• Voetspore van ds. Japie du Plessis, in 2011 uitgegee.

En medewerker aan:

• "Christene is nie op pad na ’n hopelose einde nie, maar hulle koester ’n eindelose Hoop" in 20 Gesprekke oor die OPSTANDING van Jesus uit die DOOD. Gespreksleier dr. Frits Gaum, in 2004 uitgegee deur Ex Amino-Boeke, Kaapstad.
• Christelike Kernensiklopedie (CKE), in 2008 deur Lux Verbi uitgegee onder redakteurskap van dr. Frits Gaum.

Dr. Bingle se navorsing oor Wellington se Donkies se invloed en betekenis in Afrika en Wêreldwyd beslaan meer as ongeveer 700 bladsye. Dit verskyn na verwagting in April 2018, danksy 'n subsidie van die Christelike Lektuurfonds (CLF) en beurs vir navorsing van die Erfenistrust. Ds. Andrew Murray, stigter en sendingpionier, het die Sendinginstituut se sendingstudente geïnspireer en gemotiveer met die gedagte: “Jesus is deur ’n donkie Jerusalem ingedra. So moet julle die evangelie van die Here Jesus Afrika en Wêreldwyd indra."

Breër betrokkenheid

Dr. Bingle was sowat 33 jaar lank voorsitter van Hawesending in Tafelbaai en lid van Evangelie aan Verbyvarende Seelui; ook lid van Evangelie aan Vissersbediening in Houtbaai en Kalkbaai. Dr. Bingle was 10 jaar lank voorsitter van die statutêre liggaam die Wes-Kaapse Streekraad vir Kultuursake. Van nog ’n statutêre liggaam, die Wes-Kaap Kultuurkommissie, was hy ondervoorsitter van Junie 1989 tot 2002. Van 1977 tot 2007, nagenoeg 30 jaar lank, was hy voorsitter van die Kaapstadse Afrikaanse Kultuurraad. Hy het van 2007 tot 2010 in die FAK se hoofbestuur en direksie gedien, terwyl hy voorsitter van die FAK se Gebiedsraad Kaap die Goeie Hoop was en voorsitter van die Koördinerende FAK-Wes-Kaapse Gebiedsraad. Hy het talle termyne as voorsitter van die Kaapse Afrikaanse Eisteddfod opgetree en was in 1996 stigterslid van die Eisteddfod Wes-Kaap en eerste voorsitter. Hy dien ook in die Raad van Beskermhere.

Twintig jaar lank was hy lid van die Raad op Publikasiebeheer. Ook het hy gedien as direksie- en dagbestuurslid van die Nasionale Raad van die Maatskappy vir Immigrasie (MVI) tot 31 Maart 2005. Intussen van hy agt jaar lank voorsitter van die MVI Wes-Kaap. Van 6 Mei 2005 tot 2007 was hy direksielid van Solidariteit Gemeenskapalliansie en van 2005 tot 2007 voorsitter van Solidariteit Helpende Hand Wes-Kaap. Van 2006 af is hy voorsitter en bestuurder van die parkeerterrein Protea Helpende Hand Wes-Kaap. Hy is sedert 2005 lid van die Anglo-Boereoorlog Trustee (ABO-Trustee) vir die oprigting van die Monument vir die Kaapse Rebel, Laborie, Paarl. Hy is ook direksielid van Radio Kaapse Kansel (met sy ateljee in Tygerberg, Wes-Kaap). Hy was deelstyds kapelaan van die SAW by Simonstad, Youngsfield, Ysterplaat en Wingfield.

Die rade waarin dr. Bingle gedien het of steeds dien of lid is of was, is die Kuratorium van die Gereformeerde Kerke in SA se Hammanskraalse Teologiese Skool van 1979–'84; die Kuratorium van die Gereformeerde Kerke in SA se Teologiese Skool Potchefstroom van 1984–2006); die Raad van die Potchefstroomse Universiteit vir CHO van 1989–2006; die direksie van Radio Kansel van 1989–2014; die direksie van Radio Kaapse Kansel sedert 2012; medeoprigter (en 20 jaar voorsitter, 1977-1997) van Huis Boland in Bellville – ‘n Sentrum van Residentia vir bejaardes in Chrismar, Bellville;en die Beheerraad van Biblia Nasionaal van 2006–'12.

Pryse en eerbewyse

Dr. Bingle het op 22 April 1994 ’n merieteprys vir kultuurdiens van oudpres. FW de Klerk namens die Wes-Kaapse Streekraad vir Kultuursake ontvang. Op 16 September 1999 het die voormalige staatspresident Marais Viljoen ’n prys vir voortreflike diens (klas goud) namens die Maatskappy vir Immigrasie (MVI) toegeken aan dr. Bingle sowel as ds. Lafras Moolman. Die FAK se nasionale prestigeprys vir het hy op 20 September 2002 ontvang van Piet Badenhorst, die FAK se nasionale voorsitter. Tien jaar later, op 4 Desember 2012 is ’n oorkonde aan hom toegeken vir 40 jaar se betrokkenheid by Hawesending Tafelbaai in Suid-Afrika en ook internasionaal. Hy het op 25 November 2014 ’n oorkonde van Radio Kansel ontvang wat oorhandig is deur die voorsitter, dr. Lawrence McCrystal, tydens ’n direksievergadering in die kantoor van Radio Kansel in Kilner Park, Pretoria.

Bronne

• 'n Vraelys per e-pos einde 2017 en dr. Bingle se CV.
• Predikant wie se rede hele land aangegryp het, Rapport Weekliks, 5 Julie 2020